Ustupnyja vyprabavańni ŭ 5-ja kłasy himnazij projduć u Biełarusi z 2 pa 10 červienia. Jak paviedamili ŭ pres-centry Ministerstva adukacyi, budučych piacikłaśnikaŭ čakajuć 216 himnazij, ź ich 45 — u Minsku.
Dla tych, chto choča pastupić u himnazii i himnazii-internaty, buduć praviedzienyja try ŭstupnyja vyprabavańni — pa biełaruskaj movie, ruskaj movie i matematycy. A dla tych, chto pastupaje ŭ himnazii-kaledžy mastactvaŭ — dva: pa biełaruskaj abo ruskaj movie i matematycy, a taksama pravierka zdolnaściaŭ u halinie asobnych vidaŭ mastactva.
Minadukacyi vyznačyła daty praviadzieńnia ŭstupnych vyprabavańniaŭ u 5-ja kłasy himnazij, himnazij-internataŭ, himnazij-kaledžaŭ mastactvaŭ: 5 červienia — ruskaja mova (piśmova), 7 červienia — matematyka (piśmova), 9 červienia — biełaruskaja mova (piśmova). Pravierka zdolnaściaŭ u halinie asobnych vidaŭ mastactva dla tych, chto pastupaje ŭ himnazii-kaledžy mastactvaŭ, adbudziecca 2 červienia. Pačatak usich vyprabavańniaŭ — 11.00.
U viedamstvie nahadali, što zhodna ź dziejnym zakanadaŭstvam padčas pryjomu ŭ himnazii, himnazii-internaty, himnazii-kaledžy mastactvaŭ uličvajucca jak vyniki ŭstupnych vyprabavańniaŭ pa ŭkazanych navučalnych pradmietach, tak i hadavyja adznaki pa ich, atrymanyja školnikami paśla zaviaršeńnia navučańnia na I stupieni ahulnaj siaredniaj adukacyi. Pry roŭnaj kolkaści bałaŭ (suma bałaŭ pa vynikach ustupnych vyprabavańniaŭ i hadavych adznak) pieravažnaje prava na zaličeńnie ŭ himnazii, himnazii-internaty majuć dzieci z bolš vysokim siarednim bałam hadavych adznak za IV kłas, a ŭ himnazii-kaledžy mastactvaŭ — dzieci, jakija majuć bolš vysoki ŭzrovień zdolnaściaŭ u halinie asobnych vidaŭ mastactva (jakija nabrali bolšuju kolkaść bałaŭ pa vynikach pravierki zdolnaściaŭ u halinie asobnych vidaŭ mastactvaŭ).
Zahad ab zaličeńni vučniaŭ u himnazii, himnazii-internaty, himnazii-kaledžy mastactvaŭ afarmlajecca nie paźniej za 12 červienia. Kantrolnyja ličby pryjomu buduć zaćvierdžanyja da 10 krasavika.
U vypadku, kali dzicia nie pastupaje ŭ himnaziju, himnaziju-kaledž mastactvaŭ, u jakoj atrymała pačatkovuju adukacyju, jon moža praciahnuć navučańnie va ŭstanovie adukacyi pa miescy žycharstva abo inšaj ustanovie adukacyi.
Kamientary