Sańnikaŭ pisaŭ prašeńnie ab pamiłavańni dvojčy, Bandarenku schilali da viarboŭki cytatami z Pucina

Na siadzibie prafsajuza radyjoelektronnaj pramysłovaści prajšła pres-kanfierencyja palitviaźniaŭ Andreja Sańnikava i Źmitra Bandarenki. Na scenie — Sańnikaŭ, Bandarenka, a taksama Atroščankaŭ, jaki ŭ časie prezidenckaj kampanii byŭ pres-sakratarom Sańnikava, a paśla vybaraŭ taksama trapiŭ u turmu. U zale — dziasiatak kamier, u tym liku z łukašenkaŭskaha telekanała ANT, niekalki dziasiatkaŭ žurnalistaŭ.

12.10

Adpačatku Sańnikaŭ raskazaŭ, što vyklik jaho ŭ milicyju siońnia na 11.00 byŭ abumoŭleny pastanoŭkaj na prafiłaktyčny ŭlik. Jamu prapanavali padpisać papieru ab aznajamleńni z tymi pracedurami, jakija jaho čakajuć. Sudzimaść na im zastajecca na 8 hadoŭ.

Dalej jon spyniŭsia na pytańni chadajnictva ab pamiłavańni. «Ja napisaŭ chadajnictva ab pamiłavańni.

Ja napisaŭ, što raskajvajusia. Zrabiŭ heta asensavana i kamientavać bolš nie budu. Viny ja nie pryznaŭ, chacia byŭ cisk». Pra cisk admoviŭsia raskazvać.

— Čamu tak doŭha razhladali chadajnictva, padpisanaje 20 listapada?

Sańnikaŭ kaža, što, padpisaŭšy, dumaŭ spynić pravakacyi ŭ dalejšym.

— Što było b, kali b jon nie napisaŭ prašeńnia ab pamiłavańni?

&laquoSa mnoj mahli adbycca surjoznyja rečy, až da fizičnaj likvidacyi, śmierci».

12.15

Izalacyja praciahvałasia i paśla napisańnia prašeńnia, kaža Sańnikaŭ. «Psichałahična heta dziejničała mocna». U śniežni «mianie padymali, jak kažuć na zonie, u atrad. A zatym iznoŭ viarnuli ŭ adzinočku».

U śniežni Sańnikaŭ pačuŭ pa radyjo pres-kanfierencyju Łukašenki, u tym liku i nakont prašeńniaŭ. Ale pra svajo ničoha nie pačuŭ. I paŭtorna napisaŭ prašeńnie. Paśla hetaha pačalisia peŭnyja pasłableńni.

«Prošu projaviť humannosť i pomiłovať mienia. V sodiejannom raskaivajuś», — tak dasłoŭna hučała prašeńnie Sańnikava.

Sańnikaŭ pakul nie viedaje, ci zastaniecca ŭ palitycy.

«Ja dumaju, jak žyć dalej», — skazaŭ Sańnikaŭ na pytańnie nakont taho, ci zastaniecca ŭ palitycy.

12.18

Bandarenku pakul u milicyju nie vyklikali dla pastanoŭki na ŭlik. Tamu jon nie viedaje, na kolki hadoŭ zastaniecca ŭ jaho sudzimaść.

12.19

Na dumku Sańnikava, parłamienckija vybary ŭ Biełarusi treba bajkatavać: «Ja ŭdzielničaju ŭ bajkocie. Nie dumaju, što možna havaryć pra ŭdzieł u tych umovach, u jakich u nas siońnia pravodziacca vybary». «Bajkot danosić da ludziej mahčymaść i patrebu taho, kab situacyja ŭ Biełarusi pamianiałasia».

«Terminova treba vyzvalać Kavalenku. Ja bačyŭ jaho ŭ kałonii. Žachliva vyhladaje.

12.19

Sańnikaŭ nie hatovy padrabiazna adkazvać, jakuju navuku vynies z padziej 19 śniežnia.

12.20

Ci mohuć nastupnyja vybary prezidenta prajści biez alternatyvy, sychodziačy z padziej na Płoščy? Ci nie pabajacca ludzi vyłučacca ŭ kandydaty? Sańnikaŭ kaža, što nie viedaje, što ludzi buduć rabić.

«U nas biezalternatyŭnyja vybary, pakul Jarmošyna budzie kiravać CVK».

12.23

U Navapołacku ŭ kałonii ŭ Sańnikava była mahčymaść kantaktavać z asudžanymi. Adznačaje, što ŭsie «viedali, što ja kandydat. Moža, navat šmat uvahi było hetamu nadadziena jak z boku asudžanych, tak i administracyi». Sańnikaŭ kaža, što ŭ kałonii siadzieła šmat biespadstaŭna asudžanych ludziej. Paŭtaryŭ, što «maja adsiedka skončyłasia ŭ Navapołacku», namiakajučy, što ź pieravodam pačalisia katavańni.

U «Vićbie-3», kaža Sańnikaŭ, asudžanym zabaraniali ź im razmaŭlać. Navat vitacca nielha było kiŭkom hałavy. Chto rabiŭ heta, «pierajazdžaŭ» u inšyja kałonii.

12.27

Bandarenka kaža, što ŭmovy ŭtrymańnia jaho roźnilisia ad umovaŭ utrymańnia Sańnikava. U «amierykancy» pieršyja dva miesiacy było dastatkova žorstka. Tady pierasiakaŭsia ź ludźmi, jakija siadzieli z Sańnikavym. Ź ich razmovaŭ zrazumieŭ, što ŭ Andreja ŭmovy našmat horšyja. Heta praź jaho statusnaść — jak eks-kandydata.

«Nijakaj zakonnaści nie było, — raskazvaje pra svoj turemny vopyt Bandarenka, — byli pahrozy zhvałtavańnia, kalectva. Pakazvali siužety pa BT, jak Danika chočuć zabrać u babuli». «Toje, što było z Andrejem — heta byŭ akt vialikaj dramy».

Bandarenka raskazvaje, što, kali ŭ turmie KDB jaho sprabavali zavierbavać, jon zajaviŭ, što chutčej skončyć žyćcio samahubstvam, ale nie zdasca. «Ja katalik, ale byli vypadki, kali kaścioł dazvalaŭ ździajśniać samahubstva ŭ vypadkach, kali jany traplajuć u pałon i mohuć dać pakazańni na svaich siabroŭ. U mianie takoje rašeńnie było».

Bandarenka raskazaŭ, što padčas viarboŭki KDBist sprabavaŭ padmacoŭvać svaje arhumienty cytatami z Suvorava, Kałčaka, Pucina, kahości ź mitrapalitaŭ. Bandarenka tady aburyŭsia, što jon prafnieprydatny. Kali jon źbiraŭsia zavierbavać biełaruskaha patryjota Bandarenku, to pavinien byŭ narychtavać cytaty ź biełaruskich dziejačoŭ, a nie z rasijan.

12.30

«My palityčnyja, my siła, za nas bjucca», — tak ja kazaŭ «ekanamičnym», — apaviadaje Bandarenka. — Pra ich nie pišuć, bo jany nie źjadnanyja, a tamu pra ich navat nie viedajuć. U vypadku z palitviaźniami ŭsio naadvarot. Pa słovach Bandarenki, jaho słovy znachodzili znachodzili razumieńnie siarod asudžanych.

«Byli zahady ŭ turmie nie kantaktavać sa mnoj», — jon śviedčyć toje samaje, što Sańnikaŭ. «Vyzvalicie hetych ludziej, kraina bieź ich zadychajecca. Kali nie možacie vyzvalić palityčnych, vyzvalcie ekanamičnych», — źviarnuŭsia jon da ŭładaŭ.

«Biełaruś siońnia pakrytaja sietkaj kancłahieraŭ i turmaŭ. Heta dzikaje vidovišča dla XXI stahodździa. Tysiačy ludziej chałodnych i hałodnych. Kali ŭ ja byŭ u miedčastcy, za hety čas pamierła 12 čałaviek asabista znajomych mnie» [h.zn. -- sančaści i ŭ Respublikanskaj balnicy].

12.35

Bandarenka kaža, što ŭ niejki momant dumaŭ, što mohuć pačać začyščać palityčnaje pole dalej paśla vybuchu ŭ mietro. Maŭlaŭ, na apazicyju mohuć paviesić złačynstva.

Bandarenka kaža, što ŭ Kanavałava i Kavalova byli načnyja dopyty, na jakija ich zabirali paśla adboju. Kali kala kabinieta bačyŭ čałavieka ŭ mascy, viedaŭ, što tam dapytvajuć Kanavałava i ci Kavalova. Bo ich vadzili «maski».

12.44

Na zaviaršeńnie pres-kanferencyi Andrej Sańnikaŭ jašče raz usim padziakavaŭ za salidarnaść i padtrymku: «Heta była niabačnaja salidarnaść. Asobna chaču padziakavać źniavolenym na «Vićbie», jakija padtrymali mianie, ryzykujučy stracić šaniec na umoŭna-daterminovaje vyzvaleńnie».

Źmicier Bandarenka vykazaŭ asobnuju padziaku Biełaruskaj asacyjacyi žurnalistaŭ, staršyni hetaj arhanizacyi Žańnie Litvinoj, usim žurnalistam.

Sańnikaŭ adznačyŭ, što «adčuvaŭ surjoznuju padtrymku supracoŭnikaŭ KDB i MUS, jakija siadzieli ŭ zonie». A były palitviazień Alaksandr Atroščankaŭ pažartavaŭ na heta: «Ludzi ŭ pahonach, ramantujcie turmy, nieviadoma jak usio pavierniecca».

12.45

Niezaležnyja žurnalisty paprasili skazać «paru słovaŭ u mikrafon ANT». «Vy lepšyja, čym BT. Usprymicie maje słovy jak zvarotnuju suviaź ad zekaŭ, — zreahavaŭ Bandarenka. — Ale časam kryŭdna vas hladzieć. Pałochać vas nie budu. Ale ad turmy i sumy…», — nahadaŭ Bandarenka žurnalistaŭ ANT staruju prymaŭku.

• 0
• 0
• 0
• 0
• 0
• 0
• 0
• 0