Bolš za 100 tysiač faktaŭ pieraśledu: «Viasna» apublikavała sumnuju statystyku šaści hadoŭ represij

Pravaabaroncy adznačajuć, što ŭsie ličby mohuć być značna bolšymi praz adsutnaść poŭnych źviestak u pravaabaroncaŭ.

Pravaabaroncy «Viasny» z 2020 hoda zafiksavali bolš za 100 000 faktaŭ palityčna matyvavanaha pieraśledu.

U hetuju ličbu ŭvachodziać zatrymańni, aryšty, pieratrusy, dopyty, palityčna matyvavanyja prysudy, cisk na svajakoŭ i inšyja formy represij.

Status palityčnaha źniavolenaha atrymali ŭžo 4602 čałavieki.

Za hod hetaja ličba pavialičyłasia jašče na 538 čałaviek, što śviedčyć pra praciah palityčnaha pieraśledu, niahledziačy na masavyja pamiłavańni.

Na 9 žniŭnia 2026 hoda, za kratami praciahvajuć utrymlivacca nie mienš za 879 čałaviek.

Z 2020 hoda minimum 10 016 čałaviek sutyknulisia z palityčna matyvavanym kryminalnym pieraśledam i minimum 8 670 čałaviek byli asudžanyja, u tym liku zavočna.

Tolki paśla 9 žniŭnia 2025 hoda stała viadoma jak minimum pra 750 novych palityčna matyvavanych prysudaŭ, ale sapraŭdnaja kolkaść moža być značna bolšaj.

Z pačatku represij pa palityčna matyvavanych kryminalnych spravach byli asudžanyja ŭžo 2 089 žančyn. Heta na 324 bolš, čym hod tamu.

Siońnia ŭ źniavoleńni znachodziacca 120 žančyn, siarod jakich šmatdzietnyja maci, piensijanierki, žančyny z surjoznymi zachvorvańniami.

Pravaabaroncy adnosiać da katehoryi asablivaj ryzyki 178 palitviaźniaŭ. Heta ludzi ź ciažkimi zachvorvańniami, niepaŭnaletnija na momant inkryminavanych im dziejańniaŭ, šmatdzietnyja, ludzi ŭ ciažkich siamiejnych abstavinach, a taksama tyja, chto znachodzicca na prymusovym psichijatryčnym lekavańni. Siarod ich taksama palitviaźni, jakija ŭtrymlivajucca ŭ režymie inkamunikada abo nie vychodziać na volu navat paśla zakančeńnia terminu pakarańnia.

Ahułam z 2024 hoda byli pamiłavanyja 886 palitviaźniaŭ. Ź ich 205 čałaviek paśla vyzvaleńnia byli prymusova vydvaranyja ź Biełarusi.

Minimum 3982 čałavieki byli asudžanyja pavodle kryminalnych spraŭ, źviazanych z udziełam u paślavybarčych akcyjach pratestu 2020 hoda. Dla tysiač biełarusaŭ udzieł u mirnych akcyjach staŭ padstavaj dla kryminalnaha pieraśledu, źniavoleńnia abo vymušanaj emihracyi.

Biełaruskija ŭłady praciahvajuć aktyŭna pieraśledavać zamiežnych hramadzian. Z 2020 hoda pa palityčna matyvavanych kryminalnych spravach byli asudžanyja jak minimum 115 zamiežnikaŭ.

Režym Łukašenki ŭsio čaściej vykarystoŭvaje miechanizm śpiecyjalnaj vytvorčaści dla pieraśledu biełarusaŭ, jakija byli vymušanyja pakinuć svaju radzimu. Z 2020 hoda viadoma jak minimum pra 225 palityčna matyvavanych zavočnych prysudaŭ.

Pravaabaroncam «Viasny» nie viadoma pra anivodnuju kryminalnuju spravu suprać pradstaŭnikoŭ siłavych struktur za katavańni, žorstkaje abychodžańnie abo śmierci ludziej, źviazanyja z palityčna matyvavanym pieraśledam.

Jak minimum dzieviać čałaviek pamierli ŭ niavoli: Andrej Padniabienny, Alaksandr Kulinič, Ihar Lednik, Vadzim Chraśko, Aleś Puškin, Mikałaj Klimovič, Vitold Ašurak, Dźmitryj Šlethaŭer, Valancin Štermier. Ich śmierci stali adnym z najbolš trahičnych nastupstvaŭ palityčna matyvavanaha pieraśledu ŭ Biełarusi.

• 1
• 0
• 0
• 0
• 2
• 3
• 4
• 0