Dyskahrafija, Siarhiej Novik‑Piajun, BMA‑hrup, 2007.
Siarhiej Novik‑Piajun. Dni latuć. Pieśni z-za krataŭ. [Biełaruski muzyčny archiŭ] BMA‑hrup, 2007.
Pieśni na vieršy paeta, što pieražyŭ usie try akupacyi Biełarusi, naciarpieŭsia ad savietaŭ, palakaŭ dy niemcaŭ i dažyŭ da našych dzion, ubačyŭšy pieršyja dni Niezaležnaści. Heta praciah seryi «Biełaruski muzyčny archiŭ», dzie ŭžo vyjšli dyski, pryśviečanyja Maniušku, Hienijuš, Zabejdu‑Sumickamu.
Raniej samaj viadomaj pieśniaj Novika była, biassprečna, «Zorački». Hety prajekt moža dać śvietu jašče kolki hitoŭ. Dla kaho bližej aŭtarskaja pieśnia — Taciana Biełanohaja prapanuje svajo pračytańnie «Nad kałyskaj» i «Nočki». Chto chilicca ŭ bok miakkaha hitarnaha hučańnia — prajekt «Bava» z kranalnaj «Praz akijan». Klasyčnuju muzyčnuju płyń prezentuje tut Łarysa Simakovič z toj ža «Kałychankaj», a rok‑anderhraŭnd — «Hołaja manaška» («Paviazanym» — super!). A jość ža jašče rep «Matula maja!» ad «Čyrvonym pa biełym».
Pry ŭsioj roznaści ŭ stylach, technicy, zapisu dysk słuchajecca na dziva harmanična. Tuju harmoniju tolki padkreślivaje hołas samoha paeta z ucalełych mahnitafonnych stužak: miž pieśniami raz‑poraz jon čytaje svaje vieršy, a pry kancy bonusam źmiaščajucca pieśni, śpiavanyja Siarhiejem Novikam. Svaim hołasam jon daje fory niekatorym vykanaŭcam‑udzielnikam prajektu:) U takim svojeasablivym trybjucie praktyčna niama nadta hučnych imionaŭ, tamu dysk cikavy ŭdubalt, bo možna paznajomicca jašče i z takimi vykanaŭcami, jak «Vodhuk‑kvartet», «Rostra», Inesa Leadanskaja dy inš. Svaimi pieśniami ŭpryhožyli prajekt Dančyk, Šałkievič, Vajchanski i P.L.A.N. Ź vidavočnych pravałaŭ — małaviadomy hurt «Jus Gladii» i jahonaja małaŭciamnaja sproba zapisać «Nočku» pa metale zusim biez ujaŭleńnia.
Dysk — dla ŭsich kalekcyjaneraŭ sučasnaj biełaruskaj muzyki i paezii.
Ciapier čytajuć
Prakuror prosić dla eks-pamočnika Łukašenki Ihara Bryło 12 hadoŭ źniavoleńnia5
Kamientary