Vialiki chakiej u stalicy

Siońnia ŭ Miensku pačynajecca finalnaja seryja čempijanatu Biełarusi pa chakiei. U finał vyjšli pieršaja i druhaja kamanda rehularnaha pieršynstva — mienskija «Kieramin» i «Dynama». Treba adznačyć, što ŭ paŭfinale «Dynama» vybiła z rozyhryšu mienskaje «Junactva», uładalnika załatych medaloŭ troch apošnich sezonaŭ. Šlach «Kieramina» da finalnaj seryi byŭ značna lahčejšym. U pieršych raŭndach płej‑of im supraćstajali žłobinski «Metalurh» i navapołacki «Chimik‑SKA», jakich nie adniasieš da hrandaŭ.

Apošni raz čempijonam «Kieamin» byŭ u 2002 hodzie, «Dynama» ŭvohule nikoli nie vałodała hetym trafejem. Kozyram «Dynama» źjaŭlajecca šmathadovy dośvied hulcoŭ. Zaŭziataram nia treba lišni raz tłumačyć, što značać dla biełaruskaha chakieju proźviščy Aleha Antonienki, Andreja Skabiełki, Aleha Chmyla, Leanida Facikava i šmat kaho jašče z «dynamaŭskaj» abojmy. Razam z tym usie jany ŭzrostavyja hulcy i ich moža nie chapić na ŭvieś sezon. Tamu na karyść, jak ni paradaksalna, ale «Kieramina» moža zhulać i ich maładość. Abiedźvie kamandy trenirujuć maładyja specyjalisty, «Dynama» – Eduard Zankaviec, «Kieramin» — Andrej Husaŭ. Pieramoha ŭ čempijanacie dla abodvuch budzie pieršym značnym dasiahnieńniem.

Treba adznačyć, što heta apošni paŭnavartasny rozyhryš čempijanatu Biełarusi. Naleta dźvie mienskija kamandy («Dynama» i «Junactva») abjadnoŭvajucca ŭ adnu, kab šukać ščaścia ŭ rasiejskaj vyšejšaj lizie (druhaja pa ranhu), a ŭ nacyjanalnym čempijanacie ich zamienić farm‑klub. Takoje raźvićcio padziejaŭ znajšło nierazumieńnie ŭ hramadzie zaŭziataraŭ. Pieršapačatkova mierkavałasia, što kampaniju «Dynama» i «Junactva» składzie i «Kieramin», ale «drakony» admovilisia ŭdzielničać u hetaj avantury, tamu možna prahnazavać, što bolšaść zaŭziataraŭ u finale budzie pieražyvać jakraz za «Kieramin».

Hetyja ž kamandy ŭ samym pačatku sezonu, u žniŭni, sustrakalisia ŭ finale Kubku Biełarusi, tady macniej akazałasia «Dynama». Jak to budzie hetym razam?

Sudzić finały buduć finskija refery Tom Łaaksonien i Touma Sarakanhas. Seryja projdzie da čatyroch pieramoh.

Finalnyja matčy projduć 20, 21, 24, 25 sakavika, a taksama, kali spatrebicca 27, 29 i 31 sakavika. Pieršyja dva matčy adbuducca ŭ Ladovym pałacy pa vulicy Prytyckaha ŭ Miensku, treci i čaćviorty — u Pałacy sportu na praspekcie Pieramožcaŭ. Siońnia i zaŭtra matčy buduć pačynacca a 18:30.

• 0
• 0
• 0
• 0
• 0
• 0
• 0
• 0