Najbližejšaja pamočnica Epštejna akazałasia dačkoj rasijskaha čekista, zaniataha na dziaržaŭnych prajektach u Iranie
Rasijskaja madel i vypusknica MDIMA Śviatłana Pažydajeva bolš za 10 hadoŭ praviała popleč z Džefry Epštejnam. Jana žyła na jaho srodki, padbirała jamu dziaŭčat, stvarała firmy za jaho košt — i pry hetym rehularna pieramiaščałasia pamiž Ńju-Jorkam i Maskvoj. Paśla śmierci seks-barona žančyna viarnułasia ŭ Rasiju i źmianiła imia.
Prajekt «MO» Explainer apublikavaŭ rasśledavańnie, u jakim źviartaje ŭvahu na asobu byłoj madeli — nabližanaj supracoŭnicy skandalnaha finansista, jakaja paśla jaho hibieli radykalna źmianiła svajo žyćcio. Žurnalisty vyśvietlili, što jana pachodzić ź siamji, ščylna źviazanaj z rasijskimi śpiecsłužbami, a jaje ŭłasnaja rola ŭ atačeńni miljaniera była značna šyrejšaj, čym jana ciapier sprabuje pradstavić.
Niaprostyja baćki
Znajomy siamji Pažydajevych u Maskvie raskazvaje, što baćka hieraini, Juryj Radamiravič, — «patomny čekist»: u orhanach nibyta słužyli i jaho baćka, i dzied. Juryj skončyŭ Vajenny instytut zamiežnych moŭ u 1981 hodzie. Padčas vučoby, jašče ŭ 1978‑m — za paŭtara hoda da aficyjnaha ŭvodu vojskaŭ SSSR, — dvaccacihadovym kursantam jon adpraviŭsia ŭ Afhanistan u jakaści pierakładčyka ŭ Nachryn.
Paśla raspadu Savieckaha Sajuza mužčyna zajmaŭsia vinnym biznesam, ale zachavaŭ suviazi ź dziaržaŭnymi strukturami. Z 2018‑ha jon pačaŭ rehularna, pa niekalki razoŭ na hod, lotać u Iran. Z apošniaj zafiksavanaj pajezdki jon viarnuŭsia ŭ studzieni 2022 hoda.
Jak śćviardžajecca ŭ materyjale, Pažydajeŭ-starejšy byŭ zadziejničany ŭ iranskich prajektach «Rastecha» i rasijskaj čyhunki (u prajekcie čyhunačnaha kalidora «Poŭnač — Poŭdzień»).
U 2022 hodzie jon taksama adpraŭlaŭ karespandencyju ŭ piensijnaje ŭpraŭleńnie FSB. Heta moža śviedčyć pra atrymańnie vypłat praz hetuju słužbu — typovuju praktyku dla byłych supracoŭnikaŭ abo aficeraŭ, prykamandziravanych da cyvilnych struktur.
Maci Śviatłany, Iryna Marceljeŭna, jakoj ciapier 68 hadoŭ, znachodzicca na piensii. Pavodle adkrytych źviestak, u pačatku 2000‑ch jana pracavała ŭ kampanii «Ankort», jakaja zajmałasia sistemami šyfravańnia, a taksama atrymlivała dachod u pradpryjemstvie «Presa» pry Upraŭleńni spravami prezidenta Rasii. U 2009—2010 hadach žančyna pracavała ŭ maskoŭskim ofisie Lukoil Overseas — struktury, praź jakuju «Łukojł» kiravaŭ zamiežnymi prajektami.
Pavodle šmatlikich rasśledavańniaŭ, jak naftavy hihant, tak i struktury pry Upraŭleńni spraŭ prezidenta mohuć vykarystoŭvacca jak miescy pracy dla prykryćcia supracoŭnikaŭ FSB.
Akramia taho, z 1995 pa 2021 hod maci madeli była suzasnavalnicaj hramadskaj arhanizacyi «Sajuz vieteranaŭ Vajennaha instytuta zamiežnych moŭ».
Šlach da pamočnicy Epštejna
Budučaja pamočnica mahnata naradziłasia ŭ 1984 hodzie. Paśla škoły dziaŭčyna pastupiła ŭ Maskoŭski dziaržaŭny instytut mižnarodnych adnosin (MDIMA). Tam jana atrymała dypłom bakałaŭra palitałohii ŭ 2004 hodzie, sumiaščajučy vučobu sa stažyroŭkami ŭ MZS RF i «Łukojle». Paśla hetaha studentka praciahnuła navučańnie pa sumiesnaj rasijska-francuzskaj prahramie mahistratury.
U kancy 2000‑ch maładaja rasijanka pačała madelnuju karjeru ŭ Jeŭropie i ZŠA. Jaje imia źjaviłasia ŭ bazie ahienctva MC2, jakim kiravaŭ Žan-Luk Brunel — čałaviek, jakoha śledstva taksama źviazvała z pastaŭkaj dziaŭčat dla finansista. U lutym 2022 hoda Brunel byŭ znojdzieny paviešanym u kamiery.
Jak piša Wall Street Journal, paśla pahadnieńnia sa śledstvam u 2008 hodzie Epštejn źmianiŭ taktyku: jon zasiarodziŭsia na darosłych žančynach, jakija vyhladali jak padletki — najčaściej heta byli madeli ź Jeŭropy i Rasii. Miljanier pryvablivaŭ ich abiacańniami karjernaha rostu, spasyłajučysia na svaje suviazi i prapanoŭvajučy nibyta vakansii ŭ viadomych brendach, kštałtu Victoria's Secret. Adnak hetyja abiacańni amal nikoli nie vykonvalisia.
Apynuŭšysia ŭ atačeńni miljardera, žančyny, pavodle ich słoŭ, traplali ŭ poŭnuju zaležnaść: zvyčajnyja «masažy» pastupova pierarastali ŭ seksualnyja patrabavańni. Niekatoryja śćviardžajuć, što takija sustrečy adbyvalisia štodnia, i kali inšych dziaŭčat nie było, haspadar źviartaŭsia da ŭłasnych «asistentak».
Skandalny finansist kantralavaŭ klučavyja aśpiekty ich žyćcia — finansy, miedycynskija vydatki, imihracyjny status i žyllo. Hrašovuju dapamohu jon časta afarmlaŭ jak pazyki, što jašče macniej pryviazvała achviar i nie dazvalała im prosta razarvać suviaź.
U intervju Wall Street Journal Śviatłana raskazała, što paznajomiłasia z Epštejnam jašče ŭ 2008 hodzie — jaje źvioŭ ź im madelny skaŭt, paabiacaŭšy mahčymaść prasłuchoŭvańnia dla Victoria's Secret. Paźniej jana pierajechała ŭ ZŠA, dzie apynułasia ŭ jahonym atačeńni.
U śniežni 2010 hoda fatohrafy Daily Mail zaŭvažyli jaje la asabniaka miljaniera na Manchetenie: na bahažnaj bircy, jak pisała hazieta, było vidać jaje imia i numar rejsa «Aerafłota» z Maskvy, što śviedčyła — jana pryjechała da jaho adrazu paśla pieralotu.
Praŭda, paźniej praz pradstaŭnikoŭ byłaja madel zajaviła, što na tych kadrach nie jana, i pryznała tolki bolš poźni zdymak 2016 hoda la taho ž doma. Z materyjałaŭ rasśledavańniaŭ vynikaje, što ŭ krasaviku-mai 2014 hoda Pažydajeva lacieła pieršym kłasam razam ź finansistam u Paryž.
U tym ža hodzie jana ŭzakoniła svajo znachodžańnie ŭ ZŠA, atrymaŭšy vizu katehoryi O‑1 dla asob z vyklučnymi zdolnaściami. Rekamiendacyjny list dla jaje padpisaŭ tahačasny namieśnik ministra ekanamičnaha raźvićcia Siarhiej Bielakoŭ, jaki źjaŭlajecca vypusknikom Akademii FSB.
Zhodna z apublikavanymi «fajłami Epštejna», hety čynoŭnik znachodziŭsia ŭ pierapiscy z mahnatam na praciahu niekalkich hadoŭ. Sama Śviatłana pryznałasia, što Bielakoŭ zrabiŭ heta pa prośbie jaje bosa. Pavodle jaje słoŭ, miljanier taksama zabiaśpiečyŭ jaje žyllom.
Na praciahu bolš jak dziesiaci hadoŭ rasijanka była asistentkaj Epštejna: znajomiła jaho ź inšymi madelami, adpraŭlała ankiety i pieradavała jaho ŭkazańni. U 2016—2018 hadach jana prylatała ŭ Rasiju pa dva-try razy na hod ź Ńju-Jorka, a taksama ź jeŭrapiejskich haradoŭ — Katanii, Dziusieldorfa i Miłana. U svaju čarhu, baćki dziaŭčyny, jak śviedčać danyja ab pierasiačeńni miažy, u 2015 i 2017 hadach pa niekalki razoŭ na hod naviedvali jaje ŭ Paryžy, Ńju-Jorku i Majami.
U 2018 hodzie hierainia rasśledavańnia pačała aktyŭna vystupać u miedyja jak pradprymalnica i zasnavalnica prajekta WE Talks — płatformy dla padtrymki žančyn. Finansavańnie hetych inicyjatyŭ častkova pastupała ad struktur jaje patrona. Ambasadaram WE Talks u Rasii ŭ 2019 hodzie stała Viktoryja Drokava, siastra eks-kamisara kramloŭskaha ruchu «Našy» Maryi Drokavaj. Akramia taho, vypusknica MDIMA była zasnavalnicaj fondu Education Advance, praź jaki Epštejn achviaravaŭ 50 tysiač dalaraŭ Masačusieckamu technałahičnamu instytutu.
Epstein files uncovered on Jan 30 exposed one of his victims — former Russian model Svetlana Pozhidaeva.
She was recruited with promises of jobs and connections, then financially and psychologically controlled inside his network.
System trapped adult women for years, WSJ. 1/ pic.twitter.com/wEFnjNUvYY
Źmiena proźvišča
U lipieni 2019 hoda miljaniera aryštavali pa abvinavačańni ŭ handli ludźmi i seksualnaj ekspłuatacyi; praź miesiac jaho cieła znajšli ŭ turmie. Pavodle aficyjnaj viersii, jon pakončyŭ žyćcio samahubstvam.
Praź piać miesiacaŭ paśla hetych padziej Pažydajeva adpraviłasia ŭ Maskvu, dzie źmianiła imia i pašpart, vydaliŭšy staryja akaŭnty ŭ sacyjalnych sietkach. Pad novym imiem — Safija Płat — jana afarmlaje zahranpašpart, pa jakim zajazdžaje ŭ ZŠA ŭ 2020 hodzie. Paśla jana jašče niekalki razoŭ naviedvała rasijskuju stalicu.
Padčas adnoj z pajezdak žančyna nabyła nieruchomaść u elitnym rajonie na Pavialeckaj (ahułam jaje majomaść u RF aceńvajecca amal na 600 tysiač dalaraŭ). Apošni raz jana prylacieła ŭ Rasiju ŭ pačatku 2022‑ha i kančatkova pakinuła krainu praź niekalki dzion paśla pačatku poŭnamaštabnaha ŭvarvańnia va Ukrainu.
Rasśledvalniki zdoleli vyśvietlić, što ŭ 2023—2024 hadach Śviatłana žyła ŭ Bievierli-Chiłz (Paŭdniovaja Kalifornija). Pavodle źviestak servisaŭ braniravańnia, u hety čas jana padarožničała pamiž ZŠA, Jeŭropaj i Blizkim Uschodam, časta byvajučy ŭ Dubai. Pad novym proźviščam jana zajmajecca biznesam u Silikonavaj dalinie.
Jak adznačajuć aŭtary materyjału, ich cikavaść da asoby eks-asistentki vyklikanaja jaje publičnaj dziejnaściu i mahčymymi suviaziami sa śpiecsłužbami. Jana pazicyjanuje siabie pravaabaroncaj i arhanizataram prajektaŭ «u imia žančyn», nie raskryvajučy krynic finansavańnia, tady jak spravazdačnaść pakazvaje na struktury, źviazanyja ź niabožčykam-finansistam.
Safija Płat u intervju Wall Street Journal nie admaŭlaje taho, što znajomiła bosa ź inšymi madelami, adpraŭlała jamu ich ankiety z ukazańniem uzrostu i pieradavała jaho rasparadžeńni. Jana śćviardžaje, što nie sychodziła ad miljaniera raniej, bo jon kantralavaŭ jaje vizy, hrošy i žyllo, a maŭčała z-za soramu, bo była darosłaj, a nie niepaŭnaletniaj.
Byłaja madel raskazała WSJ, što paśla śmierci finansista «adčuła siabie svabodnaj», źmianiła imia i pierajechała ŭ inšy horad. Sproby prybrać svaje danyja z dakumientaŭ i publikacyj jana nazyvaje abaronaj ad paŭtornaj traŭmy i ad abvinavačańniaŭ u tym, što jana «sama ŭsio abrała» abo źjaŭlajecca «špijonkaj». Pry hetym jana kateharyčna admaŭlaje lubyja suviazi z rasijskaj raźviedkaj.
Rasśledvalniki zaŭvažajuć, što ŭ vypadku Pažydajevaj havorka nie idzie pra dakazanuju apieracyju śpiecsłužbaŭ. Adnak jany pryvodziać słovy byłoha aficera KDB Siarhieja Žyrnova ab tym, što dzieci supracoŭnikaŭ orhanaŭ časam akazvajucca ŭciahnutymi ŭ apieracyi baćkoŭ. Naprykład, centr «Daśje» apisvaŭ vypadak, kali da sačeńnia za Navalnym pryciahvali adrazu dvuch synoŭ pałkoŭnika FSB Stanisłava Makšakova — kiraŭnika hrupy, što atruciła palityka.
U dzień, kali pamiłavali palitviaźnia Daronina, jahonaj žoncy prysudzili 8,5 hadoŭ kałonii za ŭdzieł u dvarovym čacie6
Kamientary
hetaja u ardzie a taja ú miensku .
chto sumniajecca