Miaśnikoviču paskardzilisia na Łatušku

Staršynia respublikanskaj rady hramadskaha abjadnańnia «Biełaruskaje dobraachvotnaje tavarystva achovy pomnikaŭ historyi i kultury» Anton Astapovič prapanoŭvaje raspuścić Respublikanskuju hramadskuju radu pa spravach kultury i mastactva pry Saviecie ministraŭ Biełarusi.

«5 kastryčnika 2011 hoda miełasia adbycca pasiadžeńnie rady, pryśviečanaje prablemam achovy abjektaŭ historyka-kulturnaj spadčyny i ich vykarystańnia ŭ vychavaŭčaj pracy i turystyčnaj śfiery. Ale ŭ zapłanavany termin pasiadžeńnie rady nie prajšło. 16 listapada 2011 hoda ja nakiravaŭ na imia staršyni kamisii, ministra kultury Paŭła Łatuški list z prośbaj dać infarmacyju pa sutnaści ab pierśpiektyŭnych terminach pasiadžeńnia rady pa prablemach achovy abjektaŭ historyka-kulturnaj spadčyny i ich vykarystańnia ŭ vychavaŭčaj pracy i turystyčnaj śfiery ci pryčynach, pa jakich zapłanavanaje pasiadžeńnie nie budzie praviedziena», — skazaŭ Astapovič.

Piśmovaj infarmacyi pra dakładnuju datu praviadzieńnia pasiadžeńnia rady, pavodle słoŭ Astapoviča, dahetul niama.

«Pazicyja staršyni hramadskaj rady pa spravach kultury i mastactva, ministra kultury Paŭła Łatuški pa sabatavańni praviadzieńnia pasiadžeńnia, jakoje daŭno naśpieła, padryvaje davier hramadskaści da orhanaŭ dziaržaŭnaha kiravańnia, dyskredytuje ideju dziaržaŭna-hramadskaha partniorstva ŭ śfiery kultury i, u pryvatnaści, u śfiery achovy historyka-kulturnaj spadčyny», — ličyć Astapovič.

«U suviazi z tym, što nie vykonvajecca zaćvierdžany hrafik pracy savieta pa spravach kultury i mastactva pry Saŭminie, ihnarujecca vielizarnaja kolkaść prablem, što isnujuć u śfiery achovy historyka-kulturnaj spadčyny, devalvujecca sama sutnaść isnavańnia takoha orhana. Ja jak člen rady, jak adzin z asnoŭnych aŭtaraŭ-składalnikaŭ prajektaŭ vynikovych dakumientaŭ da pasiadžeńnia, pryśviečanaha prablemam historyka-kulturnaj spadčyny, vymušany źviarnucca da staršyni Savieta ministraŭ z prośbaj razhledzieć pytańnie ab rospusku hetaj rady ŭ suviazi ź nievykanańniem uskładzienych na jaho funkcyj», — zajaviŭ Astapovič.

Pry hetym, adznačyŭ Astapovič, jon nie spadziajecca, što saviet budzie raspuščany. «Ja spadziajusia, što moj zvarot paskoryć praviadzieńnie pasiadžeńnia hetaj rady pa pytańniach achovy historyka-kulturnaj spadčyny», — skazaŭ Astapovič.

• 0
• 0
• 0
• 0
• 0
• 0
• 0
• 0