Padviedzieny vyniki konkursu biełaruskich kantent-prajektaŭ.
4 krasavika ŭ KZ «Miensk» adbyłosia ŭznaharodžvańnie najlepšych biełaruskich kantekt‑prajektaŭ. Taki konkurs užo piaty raz pravodzicca pad ehidaj najbolšaha biełaruskaha internet‑resursa TUT.BY.
Na siońnia ŭ Biełarusi zarehistravana zvyš 20 000 internet‑staronak i ich kolkaść pavialičvajecca z kožnym dniom. Pavodle padlikaŭ sacyjolahaŭ, Internetam u Biełarusi stała karystajecca 25‑32% nasielnictva. 35% ‑‑ u horadzie i 15% ‑‑ u vioscy. Najbolš internetam karystajucca ŭ Miensku, Mienskaj i Haradzienskaj abłaściach. Zasnavalnik TUT.BY Jury Zisier adznačyŭ, što adnoj z metaŭ hetaha prajektu źjaŭlajecca pryvučvańnie biełaruskich karystalnikaŭ internetu štodnia zachodzić mienavita na biełaruskija, a nie rasiejskija ci zachodnija sajty.
4 krasavika padvodzilisia vyniki konkursu jašče z toj pryčyny, što ŭ hety dzień adznačajecca dzień śviatoha Isidora Sevilskaha, zastupnika Internetu. U 1999 h. Papa Jan Pavał II sankcyjanavaŭ 4 krasavika jak Suśvietny dzień Internetu.
Uznaharody byli razdadzieny ŭ dziesiaci naminacyjach. U naminacyi «Maja Biełaruś» pieramohu atrymaŭ aficyjny sajt na anhielskaj movie Belarus.by. U «kultury» pieršaje miesca ŭziaŭ sajt pra biełaruskuju elektronnuju muzyku «Elektraśfiera», druhoje miesca — sajt «našaniŭskaha» aŭtara Siarhieja Bałachonava «Tezej biełaruskaha postmadernizmu».
U naminacyjach «navuka», «adpačynak», «sport» pieramahli adpaviedna sajty «Raśliny Biełarusi», relax.by i infarmacyjny sajt pra biełaruski baskietboł. Najlepšym u naminacyi «Hramadztva, siamja, relihija» vyznačany sajt «Carkva». Pieršym siarod karparatyŭnych kantentaŭ pryznany sajt Hidrametcentra Biełarusi pogoda.by.
A ahulnaje hran‑pry niečakana atrymaŭ sajt babrujskaj himnazii №1, hety ž sajt pieramoh u naminacyi «Adukacyja». Usie pieramožcy konkursu ŭ vyhladzie ŭznaharody atrymali try hady biaspłatnaha chostynhu, a taksama miljon banernych pakazaŭ na sajcie TUT.BY.
Malunak z images.google.com
Kamientary