Zvolnili čynoŭnikaŭ, jakija «prapanoŭvali» ŭnieści źmieny ŭ školnyja prahramy pa litaratury

Kiraŭnictva Sajuza biełaruskich piśmieńnikaŭ (SBP) atrymała adkaz na skarhu ŭ Prakuraturu Biełarusi, što tyčyłasia minułahodniaha rasparadžeńnia ministra adukacyi Alaksandra Radźkova kiraŭnikam struktur i ŭstanoŭ adukacyi «pa niedapuščeńni praviadzieńnia va ŭstanovach adukacyi mierapryjemstvaŭ pa linii hramadskaha abjadnańnia «Sajuz biełaruskich piśmieńnikaŭ». Ab hetym 16 maja ŭ Minsku na pasiadžeńni rady tvorčaha abjadnańnia paviedamiŭ staršynia SBP Aleś Paškievič.

U adkazie siarod inšaha adznačajecca, što skarha «razhledžana Prakuraturaj Biełarusi i nakiravana ministru adukacyi z prośbaj skarekciravać raniej dadzienaje im ukazańnie adnosna dziejnaści HA «Sajuz biełaruskich piśmieńnikaŭ» z ulikam patrabavańniaŭ zakanadaŭstva» i ab vynikach jaje razhladu budzie paviedamlena. «Uličvajučy, što adkaz datavany 27 krasavika, budziem čakać da kanca maja i spadziajemsia, što hety list budzie razhledžany u Ministerstvie adukacyi», — skazaŭ A.Paškievič. Jon adznačyŭ, što na ŭsie listy, jakija na praciahu šaści miesiacaŭ nakiroŭvalisia na adras A.Radźkova, kiraŭnictva SBP adkazu nie atrymała.

Pavodle rasparadžeńnia Minadukacyi, u metach prapahandy mastackaj litaratury, arhanizacyi efiektyŭnaj pracy pa ideałahičnym i duchoŭnym vychavańni vučnioŭskaj i studenckaj moładzi daručajecca zabiaśpiečyć praviadzieńnie tvorčych sustrečaŭ ź piśmieńnikami i inšych kulturna‑masavych mierapryjemstvaŭ ź ich udziełam tolki pa ŭzhadnieńni z hramadskim abjadnańniem «Sajuz piśmieńnikaŭ Biełarusi», zarehistravanym u 2006 hodzie.

Dalej A.Paškievič adznačyŭ, što uprava rady SBP asprečyła zapłanavanyja ŭładami źmieny u školnych prahramach pa biełaruskaj litaratury, u jakich miž inšym mierkavałasia «hranična minimizavać źmiest manahrafičnych tem, pryśviečanych tvorčaści narodnych paetaŭ Biełarusi Niła Hileviča i Ryhora Baradulina», «vyklučyć sa śpisa litaratury dla vyvučeńnia i pazakłasnaha čytańnia tvory Śviatłany Aleksijevič, Siarhieja Zakońnikava, Volhi Ipatavaj, Uładzimira Arłova, Michasia Skobły, Vitaŭta Čaropki i inšych apazicyjna nastrojenych piśmieńnikaŭ», a «pry vyvučeńni tvorčaści narodnaha paeta Biełarusi Janki Kupały vyklučyć pjesu «Tutejšyja». Pavodle słoŭ staršyni SBP, na sieńniašni dzień hetyja źmieny, ab jakich stała viadoma z publikacyj u interniecie, «zamarožanyja».

Razam z tym udzielniki pasiadžeńnia paviedamili, što zvolnieny z pracy čatyry čynoŭniki i śpiecyjalisty Minadukacyi i Nacyjanalnaha instytuta adukacyi, jakija mieli dačynieńnie da raspracoŭki zapłanavanych źmienaŭ u prahramach pa biełaruskaj litaratury. Siabry rady vykazali mierkavańnie, što «čystka prahram» budzie ažyćciaŭlacca, ale bolš sakretna, ab čym śviedčyć źmiest prahramy dla abituryjentaŭ VNU pa biełaruskaj litaratury, ź jakoj vykraśleny mnohija tvory vybitnych biełaruskich litarataraŭ.

• 0
• 0
• 0
• 0
• 0
• 0
• 0
• 0