Čamu Ukraina ŭdaryła pa składach Wildberries i jak usiudyisny markietpłejs źviazany z rasijskaj armijaj
«Pravierana na SVA», «Vybar bajcoŭ SVA» — takija rekłamnyja paznaki možna pabačyć nad niekatorymi tavarami na «Vajłdbieryz».
Paśla ataki na składy Wildberries u Elektrastali i Katoŭsku rasijskija pradprymalniki pačali masava raskazvać pra stračanyja partyi, šmatmiljonnyja pazyki i pahrozu bankructva. Ale zamiest spačuvańnia pad ich dopisami źjavilisia sotni kamientaroŭ ad biełarusaŭ, ukraincaŭ i kazachaŭ.
«A ŭ čym pryčyna ŭsiaho hetaha?», «Vajna viarnułasia da vašaha domu», «A ci byŭ sens źniščać «Novuju poštu»?» — pisali karystalniki.
Častka ź ich adkryta złaradničała. Inšyja sprabavali davieści, što składy najbujniejšaha rasijskaha markietpłejsa byli nie prosta hramadzianskimi abjektami. Što nasamreč viadoma pra suviaź Wildberries z vajnoj?
Ukraina mieła pretenzii da Wildberries jašče da 2022 hoda
U lipieni 2021 hoda Ukraina ŭviała sankcyi suprać rasijskaj kampanii Wildberries, jaje zasnavalnikaŭ Taćciany i Uładzisłava Bakalčukoŭ, a taksama zamiežnych padraździaleńniaŭ, u tym liku biełaruskaha.
Ukrainskija ŭłady tłumačyli sankcyi tym, što praz markietpłejs pradavalisia rasijskaja vajskovaja forma, pradukcyja ź dziaržaŭnaj i militarysckaj simvolikaj, a taksama knihi z antyŭkrainskim i prapahandysckim źmiestam.
Wildberries adkazvaŭ, što źjaŭlajecca tolki placoŭkaj, a tavary raźmiaščajuć niezaležnyja pradaŭcy. Kampanija nazyvała rašeńnie Kijeva dyskryminacyjaj biznesu.
Wildberries — adzin z najbujniejšych biznesaŭ i padatkapłacielščykaŭ Rasii. Paśla pačatku poŭnamaštabnaj vajny heta stała padstavaj dla ŭklučeńnia kampanii i jaje ŭładalnicy ŭ sankcyjnyja śpisy asobnych dziaržaŭ jak bujnoha biznesu, jaki padtrymlivaje ekanamičnuju bazu Rasii.
Na Wildberries možna kupić usio dla drona
Na Wildberries sapraŭdy pradajucca tavary, jakija mohuć vykarystoŭvacca na froncie. Heta vajskovaja forma i taktyčnaja ekipiroŭka, broniekamizelki i achoŭnyja elemienty, racyi, ciepłavizary i pryceły, detali i moduli dla FPV-dronaŭ, katuški optavałakna, navihacyjnaje i elektronnaje abstalavańnie dy inšaje.
Takim čynam, Wildberries vykarystoŭvajecca jak placoŭka dla prodažu pradukcyi padvojnaha pryznačeńnia.
Hetaj pradukcyjaj mohuć karystacca i rasijskija vajskoŭcy.
Pobač ź niekatorymi tavarami staić «rekłamnaja» paznaka — «Pravierana na SVA», «Vybar bajcoŭ SVA».
Što zajaviŭ Zialenski
Prezident Ukrainy Uładzimir Zialenski paćvierdziŭ udary pa dvuch łahistyčnych abjektach u Maskoŭskaj i Tamboŭskaj abłaściach. Jon nazvaŭ ataku adkazam na rasijskija ŭdary pa ŭkrainskich haradach i cyvilnaj infrastruktury.
Pavodle Zialenskaha, składy byli «zadziejničanyja ahresaram dla zabieśpiačeńnia pastavak padsankcyjnych kamplektujučych dla vytvorčaści dronaŭ i navihacyjnaha abstalavańnia».
Ci pracuje Wildberries na akupavanych terytoryjach
U sakaviku 2024 hoda pryznačany Rasijaj kiraŭnik akupavanaj častki Danieckaj vobłaści Dzianis Pušylin zajaŭlaŭ, što rašeńnie ab vychadzie Wildberries i Ozon na hetyja terytoryi ŭžo pryniataje.
Wildberries heta admaŭlaŭ i śćviardžaŭ, što nie maje tam ułasnych abo partniorskich łahistyčnych abjektaŭ, punktaŭ vydačy i pieravozak.
Razam z tym u Daniecku, Łuhansku i Maryupali pracujuć pryvatnyja pasiaredniki, jakija zabirajuć tavary Wildberries u Rastoŭskaj vobłaści i pieravoziać ich na akupavanyja terytoryi. Naprykład, servis «MIH» prapanuje aformić zakaz u punkt Wildberries u Rastovie-na-Donie, samastojna zabiraje jaho i pieravozić na akupavanuju častku Danieckaj vobłaści.
«Čamu vam nie škada ŭkraincaŭ?»
Pad dopisami rasijskich pradaŭcoŭ sutyknulisia dźvie absalutna roznyja karciny taho, što adbyłosia.
Rasijskija pradprymalniki kažuć: my zvyčajnyja ludzi, my nie prymali rašeńnia pačynać vajnu, ale ciapier stracili tavar, hrošy i biznes.
Ukrainskija, biełaruskija i kazachskija karystalniki adkazvajuć: vajna nie pačałasia 18 lipienia na składzie Wildberries. Jana pačałasia z rasijskaha ŭvarvańnia, a ŭkraincy ŭžo niekalki hadoŭ stračvajuć damy i blizkich.
«Sotni paviedamleńniaŭ pra tavar. I nivodnaha — pra spynieńnie vajny», — pišuć u kamientarach.
«Bolš za čatyry hady było času, kab zrazumieć adnu prostuju reč: vajna vierniecca ŭ rodnuju havań», — napisaŭ adzin z karystalnikaŭ. Inšy sfarmulavaŭ jašče karaciej: «Vy — kraina, jakaja vajuje, pryčym ahresar». Sustrakalisia i repliki kštałtu: «2022 — Adesa heta ruski horad. 2026 — radujciesia, što žyvyja».
Niekatoryja kamientatary stavili pad sumnieŭ prava rasijskich pradprymalnikaŭ adździalać biznes ad palityki. U adkaz na słovy pra stračanyja tavary i daŭhi adzin čałaviek napisaŭ: «Uvohule nikoha z vas nie škada. Kali dla vas biznes važniejšy za maral — žyvicie ciapier z daŭhami».
Inšy zaŭvažyŭ, što bujny kapitał i sam markietpłejs pieražyvuć pažar, a asnoŭny ŭdar prymuć sotni tysiač drobnych pradprymalnikaŭ.
Asobnym simvałam stała «Novaja pošta», adździaleńni i terminały jakoj nieadnarazova traplali pad rasijskija ŭdary. Ukraincy pytalisia, čamu rasijanie aburajucca źniščeńniem Wildberries, ale nie zadavalisia pytańniem pra sens atak na ŭkrainskuju paštovuju i hramadzianskuju infrastrukturu.
Pobač z napaminam pra pryčyny sustrakajecca i adkrytaje śviatkavańnie pažaru.
Akaŭnt z ukrainskim tryzubam na avatarcy napisaŭ pa-anhlijsku: «Cudoŭna bačyć Mordar u ahni». Inšy karystalnik zajaviŭ: «Pa-pieršaje, heta prosta pryhoža». Na pytańnie, navošta źniščać składy z tavarami, jašče adzin adkazaŭ: «Nam padabajecca. Hetaha dastatkova».
Kamientary
U hetym univiersalny adkaz na ŭsie pytańni j skarhi rasiejcaŭ. Ničoha bolš tłumačyć nie patrabujecca.
Nie načała by Rośsija zachvatničieskuju vojnu i nie było by krovavoho košmara, načatoho Rośsijej.....