Buš paraicca ź Milinkievičam
Adnym z akcentaŭ praskaha forumu moža stać "prablema Łukašenki". Piša ŭ svaim błohu Alaksandar Kłaskoŭski.
Mienski ekspert-mižnarodnik Raman Jakaŭleŭski źmiaściŭ u siecivie cikavy artykuł pra mierapryjemstva, jakoje maje adbycca dniami ŭ Prazie. Tam projdzie kanferencyja z udziełam Buša. Mahčyma, adbudziecca i jahonaja sustreča z zaprošanym u českuju stalicu Milinkievičam. Taksama prahnazujecca padvyšanaja uvaha da "prablemy Łukašenki".
Adznačym toj momant, što Zachad nia nadta biare pad uvahu histaryčnyja rašeńni apošniaha kanhresu demakratyčnych siłaŭ. Bo zaprašaje nie čaćviorku sustaršyniaŭ Palitrady, a "zrynutaha" Milinkieviča. Musić, nie tamu, što tak užo škada kamandzirovačnych :-) Možna šmat što zakidać eks-kandydatu, ale peŭna ž lepiej było b nie raskidacca jahonym mižnarodnym aŭtarytetam. Bo inšy apazycyjny dziejač nia chutka napracuje (kali ŭvohule napracuje) adpaviedny kapitał.
Raman Jakaŭleŭski ŭ hutarcy sa mnoj adznačyŭ, što ŭvaha Vašynhtonu (i ŭvohule Zachadu) da biełaruskaha pytańnia zaraz padvyšajecca praz šerah čyńnikaŭ. U ich liku — aktyvizacyja kantaktaŭ Biełarusi ź Iranam. "Zhadajma Juhasłaviju Miłošaviča, Irak Chusejna... Chaŭrus z Admadzinežadam — heta čarhovy prykład niezdarovaj aktyŭnaści Miensku ŭ dačynieńniach z režymami, što spračajucca z usim śvietam". Sa słoŭ Jakaŭleŭskaha, Achmadzinežad nia viečna budzie va ŭładzie (u ich tam isnuje refarmatarskaja płyń i ŭvohule idzie žorstkaja ŭnutrypalityčnaja baraćba). I z hetaje pryčyny taksama moža apynucca pad vialikim pytańniem budučynia reklamavanych sumiesnych prajektaŭ.
Narešcie, demanstratyŭnyja znaki ŭvahi da biełaruskaj apazycyi mohuć dyktavacca žadańniem administracyi Buša i tut kinuć palčatku Maskvie. Taja, miarkujučy pa ŭsim, zaraz zakłapočanaja stvareńniem u Biełarusi hruntu dla prarasiejskaj apazycyi. Vašynhton ža moža nakinuć svaju hulniu dziela ŭzmacnieńnia procivahi.
"Z adnaho boku, kanfrantacyja miž Kramlom i Zachadam nibyta vyhadnaja Łukašenku, — kaža Jakaŭleŭski. — Ź inšaha boku, vyhady ad uzmacnieńnia militarysckaha chaŭrusu z Maskvoj mohuć akazacca mizernymi, a voś pahroza ekanamičnaha zakabaleńnia ŭzrastaje".
Karaciej, u hety bok nadta nia kinieśsia.
U toj ža čas pazycyja Bruselu moža stać bolej pryncypovaj. Sa słoŭ Jakaŭleŭskaha, tut moža adhulać svaju rolu Paryž. Niezdarma ž novym prezydentam Francyi staŭ Milinkievičaŭ siabar:-)
Tak što ŭ suchoj astačy — narastańnie čyńnikaŭ, jakija dadajuć hałaŭnoha bolu biełaruskamu načalstvu.
Na Šry-Łancy ŭ 37 hadoŭ pamior biełaruski kinapradziusar Andrej Matałyha4
Kamientary