Viestki ź Litvy

Viestki ź Litvy

Pasiedžańnie Prezydyjumu VS

13 kastryčnika Šarecki sustrakajecca z Spekhardam, a pad kaniec kastryčnika naviedaje ź vizytam Narvehiju

U minułuju piatnicu ŭ budynku Vilenskaha mahistratu pad staršynioŭstvam Siamiona Šareckaha adbyłosia pasiedžańnie Prezydyjumu Viarchoŭnaha Savietu RB.

Prysutničali deputaty Hiruć, Šuškievič, Kalakin i namieśnik staršyni spradar Ciarenia. Da ich dla kansultacyjaŭ dałučyŭsia staršynia Kamitetu pravoŭ čałavieka litoŭskaha Sejmu Emanuił Zinhier. Prezydyjum pryniaŭ prajekty troch dakumentaŭ: zvarotu da ŭradu Biełarusi, zajavu da rasiejskich palitykaŭ i zajavu pra palityčnaje stanovišča ŭ Biełarusi.

Zbolšaha hetyja dakumenty paŭtarajuć źmiest užo raniej pryniatych Viarchoŭnym Savietam papieraŭ i ničoha novaha ŭ biełaruski palityčny krajavid nie dadajuć. Naprykład, što novaha ŭ «Zvarocie da členaŭ uradu»: «...Viarchoŭny Saviet Respubliki Biełaruś źviartajecca da Vas z prapanovaj — stańcie na bok zakonu i admoŭciesia ad hvałtoŭnaha ŭtrymańnia ŭłady, bo heta, ab čym Vy taksama dobra viedajecie, ciahnie za saboju kryminalnuju adkaznaść». Što takoje «stać na bok zakonu»? Zvolnicca sa słužby? Ci pierajechać u Vilniu da spadara Šareckaha?

Ci padniać pa tryvozie vojski j aryštavać Łukašenku? Pakolki Staršynia Prezydyjumu VS źjaŭlajecca adzinym lehitymnym kiraŭnikom dziaržavy, dyk u jahonaj kampetencyi davać zahady, a nie papiaredžvać. A ŭ vypadku nievykanańnia zahadaŭ — karać za dziaržaŭnuju zdradu. I ničoha śmiešnaha ŭ hetkich zahadach niama. Prynamsi, heta nia bolš śmiešna, čym čarhovyja papiaredžvańni faktyčnych złačyncaŭ, jakija vykonvajuć złačynnyja zahady svajho «pachana».

Zvarot da rasiejskaj hramadzkaści naahuł hučyć biazadrasna. Nieviadoma kaho papiaredžvajuć, što Łukašenka ŭzurpatar, a jahonyja podpisy niesapraŭdnyja. Pry tym niby j pužajuć: «...Padtrymka i zaihryvańnie rasiejskich palitykaŭ z antynarodnym dyktatarskim režymam, ustalavanym A.Łukašenkam u Biełarusi, kładziecca čornaj plamaju na tyja dobryja adnosiny, jakija maje biełaruski narod u dačynieńni da narodaŭ Rasiei». Hetaja zajava raspracoŭvałasia pa-rasiejsku, jak, darečy, i naahuł «abščajucca» mižsobku členy Viarchoŭnaha Savietu. Zrešty, heta ich kanstytucyjnaje prava. Ale ŭ sferu ichnych pravoŭ uvachodzić i jurydyčnaja likvidacyja, naprykład, łukašenkaŭskaje symboliki. Jak Viarchoŭny Saviet nie pryznaje tyja referendumy, dyk čamu nia być paśladoŭnymi j anulavać ratyfikacyju ichnych vynikaŭ. Usio ž niejkaja sprava. Bo ludzi, jakija hatovyja vyjści na vulicy Maršam Svabody, pojduć nie pad tymi ściahami, pad jakimi siadzić Viarchoŭny Saviet.

Dakumanty čarhovy raz śviedčać, što VS u svaim siońniašnim składzie nia ŭ stanie vystupać z kankretnymi palityčnymi inicyjatyvami. Jaho zadača na siońnia značna ściplejšaja — vyžyć. A pa źniknieńni Hančara heta hučyć užo litaralna... Mo tamu j nie šukajecca sposabaŭ zajavić pra siabie hučna. Z druhoha boku, hetaja rachmanaść, bojaź zdenervavać ABSE albo ZŠA, niedavier da dziejsnych publičnych palitykaŭ, pieratvaraje pakrysie VS u klub starejšynaŭ, jakich i dalej buduć vietliva prymać, uvažliva słuchać... Adnak nichto nia budzie investavać u hetaje pradpryjemstva, jakoje nia maje jasnaha biznes-planu. Pahatoŭ, ichnyja mety j zadačy nia bačnyja nacyi...

Adnak palityčnaja aktyŭnaść u Vilni ŭsio ž maje i svoj plon. Krok za krokam Litva nabližajecca da paŭnavartasnaha pryznańnia Viarchoŭnaha Savietu j spadara Šareckaha jak adzinaj i zakonnaj ułady Biełarusi. Uśled za litoŭskim parlamentam stali hatovyja, narešcie, da dyjalohu i vykanaŭčyja ŭłady. Na aŭtorak, naprykład, zaplanavanaja ŭžo aficyjnaja sustreča Šareckaha ŭ MZS Litvy. Nikoha ŭžo tut nia dziviać i jahonyja aficyjnyja sustrečy ŭ pasolstvach roznych krainaŭ. Mahčyma, na hetym tydni adbuducca čarhovyja vizyty sp.Šareckaha ŭ ambasady Niamieččyny j Aŭstryi.

Učora, iznoŭ praź Vilniu, u Niamieččynu, pa daručeńni Prezydyjumu Viarchoŭnaha Savietu, vypravilisia deputataty Labiedźka j Domaš — dla pieramovaŭ z pradstaŭnikami parlamentaŭ Eŭropy. Na 13 kastryčnika pryznačanyja aficyjnyja pieramovy sp.Šareckaha z pasłom ZŠA ŭ Biełarusi, Spekhardam. A naprykancy kastryčnika Siamion Šarecki naviedaje ź vizytam Narvehiju. Prynamsi, adnaje mety jany ŭsio ž dasiahajuć — zamiežnaja palityka Biełarusi znachodzicca nasamreč u ichnych rukach.

Lićvin