Tydzień našaha žyćcia

Tydzień našaha žyćcia

Niezaležnaść

U Miensku pieršych pasažyraŭ pieravioz tramvaj, vyrableny na «Biełkamunmašy». Vahon maje sučasny dyzajn, ale hrymić na rejkach macniej, čym jahonyja českija analahi. Tramvaj «uviali ŭ stroj» da Dnia vyzvaleńnia Miensku ad niemcaŭ. Da 3 lipienia prymierkavali i pieršy kancert u novym, hihantyčnym Pałacy Respubliki na Kastryčnickaj płoščy. Praspekt Skaryny na try dni pierakryli i razharnuli na im vielizarny kirmaš na tysiačy jatak. Ale ludzi zbolšaha zastalisia siadzieć na dačach, i praspekt byŭ paraŭnalna pusty.

Łukašenka, pierachodziačy ź biełaruskaj movy na rasiejskuju, vystupiŭ na ŭračystym schodzie z zaviareńniami ŭ niedatykalnaści biełaruskaj niezaležnaści. Schod sustreŭ ich vopleskami. «Rasiei niavyhadna, kab Biełaruś straciła svoj suverenitet, jak Savieckamu Sajuzu niavyhadna było prymać u svoj skład Baŭharyju», — sam sabie dakazvaŭ A.Łukašenka. «Biełarusi niavyhadna stračvać svoj suverenitet», — tak prainterpretavała słovy Łukašenki rasiejskaja praŭradavaja internetaŭskaja gazeta.ru. «Voś tut kažuć, što jany rasijcy, a nia ruskija», — abvierh A.Łukašenka falsyfikataraŭ linhvistyčnaj praŭdy. — «Nijakija jany nie rasijcy, a ruskija, bo zaŭsiody hatovyja addać nam toje, što nam patrebna, addać bieskaryśliva», — prykładna tak arhumentavaŭ jon svaju ŭpeŭnienaść.

Kamunisty — strajkbrechiery

Kamunisty (na čale z Kalakinym) dali Łukašenku zhodu na ŭdzieł u parlamenckich vybarach, a za heta ich ciapier ci nie štoviečara vypuskajuć na ekrany BT. Kamunistaŭ Rasieja nie baicca — jany tak i tak za Sajuz. Pasłuha za pasłuhu. I ciapier kamunisty pačali kampaniju suprać Šareckaha: kažuć, jamu treba abo skłaści ź siabie paŭnamoctvy staršyni Viarchoŭnaha Savietu, abo viarnucca ŭ Biełaruś. A ź ichnych ruk kampaniju padchoplivaje Zimoŭski i BT — užo zusim biespardonna. Z adychodam kamunistaŭ praca Viarchoŭnaha Savietu 13 sklikańnia akazvajecca faktyčna paraližavanaja.

Bitva za siena

Ceny znoŭ papaŭźli ŭvierch — na 5,5% za pieršyja try tydni červienia.

TBM sabraŭ 27 tys. podpisaŭ za adkryćcio Nacyjanalnaha ŭniversytetu, ź ich 8 tys. u Lidzie, 5 tys. u Miensku, 103 — u vioscy Chilkavičy Žytkavickaha rajonu i 114 — u Sankt-Pieciarburhu.

U Homieli 13-hadovy chłapčuk zachacieŭ pakazać «što ta ja» dy zalez na 190-metrovuju televiežu. Naviersie jamu stała strašna, i spuścicca sam jon užo nia zmoh. Pabačyli jaho tam tolki dziela istotnaha paharšeńnia jakaści radyjosyhnału.

Tamsama ŭ Homieli pamior Ryhor Klimovič — adzin z kiraŭnikoŭ paŭstańnia viaźniaŭ u Narylskim lahiery, jaki apisaŭ heta ŭ svajoj knizie «Kaniec Harłahu». Było jamu 75. Ziamla jamu pucham. Na hod mienš pražyŭ artyst Kupałaŭskaha Mikałaj Jaromienka. Lekary daŭno zabaraniali jamu ihrać u apošnim jahonym spektakli «Kaściumer», ale jon usio adno ihraŭ, jašče i ŭ palitycy rvaŭsia ŭdzielničać, u łukašenkaŭskija pałaty ŭvachodziŭ.

A dvoje dziadoŭ, ichnych adnahodkaŭ, u Duboi (heta staroje miastečka na zachad ad Pinsku), pabilisia na popłavie — nie padzialili sienažaci. Adzin adnomu daŭ miantaškaj pa hałavie, druhi ŭ adkaz prastreliŭ pieršamu nahu. Na Kamianieččynie ŭ takoj sama sytuacyi adzin adnomu siena padpaliŭ, i jano zhareła razam z vozam. Ludzi bjucca za siena, značyć budziem z małakom.

B.T.