Tysiačy ludziej iznoŭ manifestavali ŭ paniadziełak. Milinkievič zaklikaŭ da biesterminovaha pratestu. Čarhovy masavy mitynh zaplanavany na 18.30 aŭtorka
Na Kastryčnickaj płoščy panavała eŭfaryja: niamnohija čakali, što pratestavać u centar iznoŭ źbiarecca stolki ludziej. Asablivuju atmasferu stvarali hudki aŭtamabilaŭ – bolšaść aŭtamabilistaŭ vyjaŭlali takim sposabam salidarnaść ź mitynhoŭcami. Moładź koŭzałasia na kańkach ź bieł-čyrvona-biełymi ściahami za plačyma. Ściahoŭ, ściažkoŭ i ściažočkaŭ było niamała – ludzi skarystalisia mahčymaściu spakojna pranieści ich da płoščy. Zdajecca, na padychodach da centru zatrymali tolki adnaho čałavieka – Uładzimier Kiškurnu.
Pieravažnuju bolšaść mitynhoŭcaŭ składała moładź. Jana brała inicyjatyvu ŭ svaje ruki: sioj-toj prynosiŭ i razdavaŭ stužki, sinija baloniki. U termasach prynosili čaj.
Mitynh pačaŭsia z vystupu Alaksandra Milinkieviča. Jon zajaviŭ pra niepryznańnie vynikaŭ vybaraŭ.
Kali na płoščy źjaviŭsia kandydat ad abjadnanaj apazycyi Alaksandar Milinkievič ludzi vitali jaho vokličami: “Mi-lin-kie-vič! Mi-lin-kie-vič! Mi-lin-kie-vič!” Alaksandar Milinkievič źviarnuŭsia da ŭdzielnikaŭ mitynhu z pramovaj: (Milinkievič: ) “Darahija suajčyńniki, šanoŭnyja siabry! Jany nam siońnia abjavili ichnyja vyniki. Jany dumajuć, što kahości pierakanajuć. Im zdajecca, što chtości pavieryć. Bolšaść narmalnych ludziej śmiajecca nad hetymi pracentami. Heta nia vybary, heta – dziaržaŭny, antykanstytucyjny pieravarot! Hańba!” Milinkievič zaklikaŭ ličyć Łukašenku niezakonnym prezydentam.
Druhi kandydat Alaksandar Kazulin, jaki razam z prychilnikami ŭstalavaŭ na płoščy zrobleny biełaruskimi mastakami “Zvon svabody” zaklikaŭ ludziej uchvalić Deklaracyju naroda Respubliki Biełaruś. U joj adznačajecca, što 19 sakavika ŭ Biełarusi adbyŭsia antykanstytucyjny pieravarot i Alaksandar Łukašenka u zmovie sa staršynioj Centarvybarkamu Lidzijaj Jarmošynaj uzurpavaŭ uładu. Alaksandar Kazulin vystupiŭ z takimi prapanovami:
“Pryznać Respubliki Biełaruś praviedzienyja 19 sakavika 2006 hodu adbytymi, ale niesapraŭdnymi. Pryznačyć praviadzieńnie paŭtornych vybaraŭ u adpaviednaści z zakonam Respubliki Biełaruś na 16 lipienia 2006 hodu”.
Mitynh adzinahałosna ŭchvaliŭ Deklaracyju narodu Respubliki Biełaruś, prapanavanuju kandydatam Alaksandram Kazulinym.
Paśla hetaha Alaksandar Milinkievič zajaviŭ pra svajo rašeńnie zastacca na płoščy na noč i zaklikaŭ ludziej prynosić haračyja napoi i ciopłyja rečy.
Jaho padtrymali pradstaŭniki ruchu “Chopić!”, što zaklikali prysutnych na płoščy prynosić z domu namioty i raźbić na płoščy pałatačny haradok.
Alaksandar Milinkievič i jahonaja davieranaja asoba Alaksandar Dabravolski zaklikali prysutnych nie razychodzicca, zvanić rodnym, prasić ich prynosić na płošču ciopłaje adzieńnie, ježu, kavu i harbatu.
Niahledziačy na sprobu ahientaŭ u cyvilnam pieraškodzić, paŭstali pieršyja namioty. Vakoł ich ščylnym šeraham staić achova.
Milinkievič asabista prajšoŭ u namiotavy haradok i pryvitaŭ jaho nasielnikaŭ. Na 22.30 namiotaŭ było vosiem.
Alaksandar Kazulin taksama skazaŭ, što budzie na płoščy da taho času, pakul na joj buduć ludzi.
Na mitynhu taksama vystupili Anatol Labiedźka, akademik Alaksandar Vajtovič, deputat Dziarždumy Rasiei Ŭładzimier Ryžkoŭ, inšyja hości z zamiežža.
Ludzi z zachapleńniem sustrakali stajki biełych čajek u niebie – viastunak viasny. Padpiavali Lavonu Volskamu, Źmitru Bartosiku, što piajali ŭžyvuju. Horača vitali Ŭładzimiera Arłova, Andreja Chadanoviča. Plaskali Inie Kulej, Milinkievičavaj žoncy.
Sam Milinkievič niekalki razoŭ braŭ słova, choć byŭ zusim chrypły. Narod vitaŭ jaho avacyjaj.
Mitynh išoŭ siońnia žvaviej, čym učora, dziakujučy lepšamu hukaŭzmacnieńniu i čarhavańniu muzyki j vystupaŭ.
Vystupali nia tolki palityki ź Miensku. Słova davali i pryježdžym ź inšych haradoŭ. Śmiech i vopleski sarvaŭ pałkoŭnik-kamunist z Tałačyna Mikoła Pietrušenka, aburyŭšysia cenami na bulbu, jakija vyraśli pad tysiaču rubloŭ. Ćviorda pramaŭlaŭ deputat z Homiela Jury Hłušakoŭ.
Pradstaŭnica Babrujska raspaviała, što ichnuju mašynu zatrymali pa darozie, ale jany zdoleli prarvacca na płošču.
Siarhiej Sałaš, jaki siońnia byŭ vyzvaleny z turmy na Akreścina, vystupiŭšy na płoščy, skazaŭ, što za Milinkieviča na Akreścina prahałasavała 90%.
Plamieńnik Niła Hileviča pieradaŭ vitańni ad narodnaha paeta Biełarusi, jaki chvareje.
Syn Michaiła Maryniča Ihar pieradaŭ pasłańnie ad baćki: “Ja vieru ŭ pieramohu”.
Deputat parlamentu Narvehii, vystupajučy na Kastryčnickaj płoščy, zajaviŭ, što vočy śvietu siońnia prykavanyja da hetaj płoščy ŭ Miensku.
Mitynhoŭcy avacyjami vitali paviedamleńnie, što Eŭraźviaz nie pryznaŭ vybaraŭ spraviadlivymi, ZŠA, Polšča, Litva nie pryznali vynikaŭ hetych vybaraŭ.
Družyna "Pravaha aljansu" achoŭvaje hukaŭzmacnialnuju aparatury i vystupoŭcaŭ.
Vakoł płoščy ŭłady zabaranili prodaž haračych napojaŭ (čaju, kavy) – navat u “Makdonaldzie”. Uviečary niekatoryja ludzi pačali padvozić kavu i pradukty chłopcam, što zasieli ŭ namiotach.
Na Kastryčnickuju patrochu pačali padvozić ciopłyja rečy, haračuju kavu i harbatu.
Nad namiotami łunajuć bieł-čyrvona-biełyja ściahi.
Milicyja praciahvaje pahražać mlavymi zajavami pra “administracyjnuju adkaznaść”.
U 23.00 Milinkievič zajaviŭ, što dasiahnutaja damoŭlenaść ź milicyjaj: ludzi zastajucca na płoščy, ale muzyku vyklučajuć, “kab nie parušać hramadzkaha paradku”.
Alaksandar Kazulin paabiacaŭ, što zaŭtra padjeduć jahonyja inšyja prychilniki z rehijonaŭ.
Na 23.00 na płoščy zastavałasia niekalki tysiačaŭ čałaviek.
Vyniki dnia: časam składałasia ŭražańnie, što lidery apazycyi ŭ svajoj taktycy niekrytyčna kapijujuć ukrainski scenar pratestu. Ale taksama składałasia ŭražańnie, što ludziam na płoščy mała abychodzić taktyka palitykaŭ – jany nastrojenyja pratestavać i nie zdavacca.
Aŭtorak pakaža, ci ludzi ŭ Miensku hatovyja vychodzić na płošču štodzionna až da Dnia Voli, jaki sioleta moža nabyć całkam novy sens.
Naviny ŭ režymie on-łajn možna čytać na community.livejournal.com/minsk_news
Kamientary