Rymski lehijaner Biełarus

Kinaprajekt “Pryhody Asteryksa j Abeliksa” pavodle znakamitych komiksaŭ i multfilmaŭ zadumvaŭsia jak svojeasablivy “eŭrapiejski adkaz Halivudu”.

Mierkavałasia, što film ź biudžetam 50 młn. eŭra pasunie amerykanskija blakbastery na suśvietnych kinarynkach. Premjera pieršaha filmu — “Asteryks i Abeliks suprać Cezara” — adbyłasia ź vializnaj pompaj, ale prestyžu Halivudu nie paškodziła zusim. Jašče mienš šancaŭ u druhoha filmu — “Asteryks i Abeliks: misija Kleapatra”, jaki vyjšaŭ na kinaekrany Miensku.

Siužet hetaj bajki niemudrahielisty. Carycy Kleapatry (Monika Belučy, jakaja ciaham usiaho filmu źmianiaje ekzatyčnyja stroi na eratyčnyja i naadvarot) raptoŭna zakarcieła, kab Juli Cezar (komik Krystyjan Klaŭje) pryznaŭ ehipcianaŭ najlepšym narodam u śviecie. Caryca zahadvaje zbudavać superpałac za try miesiacy. Pakolki staražytnaehipeckim dojlidam (ź jakich adzin razvažaje by Dejł Karnehi, a ŭ druhoha tolki adna ruka) zadačka nie pa zubach, jany zaprašajuć na dapamohu dvuch barbaraŭ-hałaŭ (Asteryksa j Abeliksa), sabaku Idefiksa i druida Perynaksa, jakomu nieviadoma navošta spatrebilisia manuskrypty Aleksandryjskaj biblijateki. “Šabašniki” vykanali pastaŭlenuju zadaču bliskuča: napaili čaroŭnym ziellem budaŭnikoŭ, adłamali nos Śfinksu (a my, durni, dumali, što heta žaŭniery Napaleona zrabili!), znajšli vyjście ź labiryntu piramidy, razhramili rymskaje vojska. Pry hetym im rehularna traplalisia na šlachu prydurkavatyja piraty, jakich jany vymušanyja byli tapić to ŭ mory, to ŭ Nile.

Chapaje ŭ filmie hehaŭ — kamičnych trukaŭ, a taksama paradyjna-satyryčnych dyjalohaŭ — pryblizna pa adnym na kožnyja try chviliny ekrannaha času. Ad amerykanskich kamedyjaŭ u “Misii” zasvojena hałoŭnaje — treba vyśmiejvać i paradyjavać usio, što na słychu, i ŭsio, što kaliści kimści było źniata. I tamu rymskija žaŭniery majuć imiony Biełarus i Antyvirus, a centuryjon Saplivus addaje zahad stralać z katapultaŭ sa słovami: “Imperyja nanosić udar u adkaz!” Ehipeckija dojlidy bjucca pamiž saboj u pavietry, jak kunh-fuisty, i razmaŭlajuć pa-kitajsku, a prydvorny žyvapisiec maluje Kleapatru tolki ŭ profil i asudžaje madernistaŭ, jakija stvarajuć partrety ŭ anfas.

Pakul franka-italjanski kinahumar daje foru biełaruskamu — u našaj kamedyi “Śviežyna z salutam” siužet krucicca vakoł niaŭmielstva paŭćviarozych viaskovych mužykoŭ zakałoć śvińniu.

Jahor Konieŭ

• 0
• 0
• 0
• 0
• 0
• 0
• 0
• 0