Hetym razam marskija desantniki musiać dałučycca da amerykanskich sałdataŭ u Kuvejcie, kab razam pačać nastup na Irak z poŭdnia.
Ich mohuć taksama pierakinuć hielikopterami na irackuju terytoryju z karabloŭ u Persydzkaj zatocy, kab jany abstalavali nastupalnyja bazy, da jakich potym buduć ruchacca asnoŭnyja vajskovyja złučeńni, — hetkaja taktyka była ŭžytaja ŭ paŭdniovym Aŭhanistanie ŭ 2001 h.
Irak dy Kareja
Staŭleńnie ZŠA da režymaŭ Iraku dy Paŭnočnaj Karei zbolšaha adnolkavaje, ale padychody roznyja. ZŠA hatovyja vajavać u Iraku, ale raźličvajuć vyrašyć spravu ŭ Karei mirna. Pa-pieršaje, ZŠA majuć traŭmatyčny dośvied prajhranaj vajny ŭ Karei dy paśpiachovy — aperacyi «Bura ŭ pustyni». Pa-druhoje, Paŭnočnaja Kareja nie ŭjaŭlaje dla ZŠA vialikaha intaresu, u adroźnieńnie ad Iraku, jaki maje 11% suśvietnych zapasaŭ nafty. Pa-druhoje, Irak paśla «Bury ŭ pustyni» tak i nia zmoh adnavić abaronny patencyjał. Jon zdoleŭ zachavać u bolš-mienš naležnym stanie tolki arsenał supraćtankavaj zbroi. Najaŭnaść vialikaj kolkaści zbroi masavaha źniščeńnia ŭ Iraku vyklikaje sumnievy. A Paŭnočnaja Kareja choć siońnia moža strelić rakietaj z «brudnaj» jadravaj bojehałoŭkaj.
Aleś Kudrycki
Terytoryja: 437 km2
Susiedzi: Iran, Jardanija, Kuvejt, Saudaŭskaja Arabija, Syryja, Tureččyna
Nasielnictva: 24 młn.
Kolkaść mužčynaŭ, pryhodnych dla vajny (ad 15 da 49 hod): 3.430.819 čałaviek
Siaredniaja naradžalnaść: 4,63 dziciaci na žančynu
Štohadovyja vydatki na armiju: 1,3 młrd. dalaraŭ
Kolkaść tankaŭ: 2200
Kolkaść vajskovych samalotaŭ: 350
Vajna ŭ Iraku moža začapić Biełaruś
Biełaruś nie adzin raz vinavacili ŭ handli ź Irakam u abychod sankcyjaŭ AAN, nazyvajučy jaje «prapuščanym źvianom u vosi zła». Najbujniejšym skandałam da hetaha času była letašniaja aficyjnaja zajava Styvena Pajfera, namieśnika pamočnika dziaržsakratara ZŠA, nakont biełaruskich pastavak zbroi režymu Chusejna.
14 studzienia najbujniejšyja infarmacyjnyja ahiencyi śvietu paviedamili, što livanskija ŭłady zatrymali hramadzianaŭ Libii Valida Zaatary dy Chaliła Asaada, jakija padazrajucca ŭ naładžvańni nielehalnaj pastaŭki ź Biełarusi tankavaha abstalavańnia ŭ Irak. Pradstaŭniki našaj krainy hetyja źviestki amal nijak nie prakamentavali. Presavaja słužba Rady biaśpieki ŭvohule śćviardžaje, što nia maje faktyčnych dokazaŭ incydentu. Presavy sakratar MZS Andrej Savinych ličyć źviestki pra pastaŭki biełaruskaha ŭzbrajeńnia ŭ Irak prydumkaj.
Pavodle śviedčańnia bejruckaj hazety «The Daily Star», Adnan Adum, hieneralny prakuror Livanu, taksama zajaviŭ, što hruz — nie biełaruskaha pachodžańnia. 625 šlemafonaŭ, 240 kamplektaŭ tankavaha radyjoabstalavańnia dy ŭniformy ahulnaj vahoju 12 tonaŭ byli pryviezienyja z Charvatyi. Mahčyma, što imia našaj krainy — najbolš imaviernaha nielehalnaha pastaŭščyka zbroi ŭ Irak — vykarystoŭvałasia tolki ŭ lipavych dakumentach. Kali heta tak, možna budzie ŭzdychnuć z palohkaj. Niasoładka pryjšłosia b krainie, jakuju złavili na sajuźnictvie ź Irakam.
Kamientary