Гэтым разам марскія дэсантнікі мусяць далучыцца да амэрыканскіх салдатаў у Кувэйце, каб разам пачаць наступ на Ірак з поўдня.
Іх могуць таксама перакінуць гелікоптэрамі на ірацкую тэрыторыю з караблёў у Пэрсыдзкай затоцы, каб яны абсталявалі наступальныя базы, да якіх потым будуць рухацца асноўныя вайсковыя злучэньні, — гэткая тактыка была ўжытая ў паўднёвым Аўганістане ў 2001 г.
Ірак ды Карэя
Стаўленьне ЗША да рэжымаў Іраку ды Паўночнай Карэі збольшага аднолькавае, але падыходы розныя. ЗША гатовыя ваяваць у Іраку, але разьлічваюць вырашыць справу ў Карэі мірна. Па-першае, ЗША маюць траўматычны досьвед прайгранай вайны ў Карэі ды пасьпяховы — апэрацыі «Бура ў пустыні». Па-другое, Паўночная Карэя не ўяўляе для ЗША вялікага інтарэсу, у адрозьненьне ад Іраку, які мае 11% сусьветных запасаў нафты. Па-другое, Ірак пасьля «Буры ў пустыні» так і ня змог аднавіць абаронны патэнцыял. Ён здолеў захаваць у больш-менш належным стане толькі арсэнал супрацьтанкавай зброі. Наяўнасьць вялікай колькасьці зброі масавага зьнішчэньня ў Іраку выклікае сумневы. А Паўночная Карэя хоць сёньня можа стрэліць ракетай з «бруднай» ядравай боегалоўкай.
Алесь Кудрыцкі
Тэрыторыя: 437 км2
Суседзі: Іран, Ярданія, Кувэйт, Саудаўская Арабія, Сырыя, Турэччына
Насельніцтва: 24 млн.
Колькасьць мужчынаў, прыгодных для вайны (ад 15 да 49 год): 3.430.819 чалавек
Сярэдняя нараджальнасьць: 4,63 дзіцяці на жанчыну
Штогадовыя выдаткі на армію: 1,3 млрд. даляраў
Колькасьць танкаў: 2200
Колькасьць вайсковых самалётаў: 350
Вайна ў Іраку можа зачапіць Беларусь
Беларусь не адзін раз вінавацілі ў гандлі з Іракам у абыход санкцыяў ААН, называючы яе «прапушчаным зьвяном у восі зла». Найбуйнейшым скандалам да гэтага часу была леташняя афіцыйная заява Стывэна Пайфэра, намесьніка памочніка дзяржсакратара ЗША, наконт беларускіх паставак зброі рэжыму Хусэйна.
14 студзеня найбуйнейшыя інфармацыйныя агенцыі сьвету паведамілі, што ліванскія ўлады затрымалі грамадзянаў Лібіі Валіда Заатары ды Халіла Асаада, якія падазраюцца ў наладжваньні нелегальнай пастаўкі зь Беларусі танкавага абсталяваньня ў Ірак. Прадстаўнікі нашай краіны гэтыя зьвесткі амаль ніяк не пракамэнтавалі. Прэсавая служба Рады бясьпекі ўвогуле сьцьвярджае, што ня мае фактычных доказаў інцыдэнту. Прэсавы сакратар МЗС Андрэй Савіных лічыць зьвесткі пра пастаўкі беларускага ўзбраеньня ў Ірак прыдумкай.
Паводле сьведчаньня бэйруцкай газэты «The Daily Star», Аднан Адум, генэральны пракурор Лівану, таксама заявіў, што груз — не беларускага паходжаньня. 625 шлемафонаў, 240 камплектаў танкавага радыёабсталяваньня ды ўніформы агульнай вагою 12 тонаў былі прывезеныя з Харватыі. Магчыма, што імя нашай краіны — найбольш імавернага нелегальнага пастаўшчыка зброі ў Ірак — выкарыстоўвалася толькі ў ліпавых дакумэнтах. Калі гэта так, можна будзе ўздыхнуць з палёгкай. Нясоладка прыйшлося б краіне, якую злавілі на саюзьніцтве з Іракам.
Каментары