Šuškievič i Karol šukajuć zhody, Palevikova stvaraje Demakratyčnuju partyju.Źjezd Biełaruskaj sacyjał-demakratyčnaj hramady, zaplanavany na 14 vieraśnia, pieraniesieny na paźniejšy termin. Staršynia partyi Stanisłaŭ Šuškievič vyrašyŭ da jaho lepš padrychtavacca — na źjeździe musiła być pieravybranaje kiraŭnictva.
Epapieja z abjadnańniem BSDH i niezarehistravanaj Abjadnanaj sacyjał-demakratyčnaj partyi ciahnułasia bolš za hod. Apošniaja tak i nia zdoleła zarehistravacca. U vyniku pra abjadnańnie ŭžo niama havorki — prychilniki A.Karala musiać ulicca ŭ šerahi Hramady. Mienavita taki varyjant jašče letaś prapanoŭvaŭ Šuškievič.
Pavodle słovaŭ Alaksieja Karala, sioleta razam ź im u BSDH ustupili bolš za 500 čałaviek, rychtujuć zajavy jašče 50. Ź ich liku ŭ Centralnuju Radu partyi byli kaaptavanyja 5 čałaviek, ź jakich try ŭvajšli ŭ vykankam (Karol, Znaviec i Hryb). Takim čynam, BSDH pavialičyłasia na čverć. Heta vyklikała naściarohu ŭ niekatorych partyjnych staražyłaŭ. Aktyŭnyja karaloŭcy, jakija zasumavali pa lehalnaj palitycy, mohuć pastupova zachapić klučavyja pasady (heta paćvierdzili vybary ŭ miascovyja saviety, kudy prabiłasia hrupa karaloŭcaŭ). Navat S.Šuškievič u razmovie z karespandentam «NN» nervavaŭsia: «Što da Karala, dyk mnie padajecca, što ŭ čałavieka ambicyj krychu bolš, čym mahčymaściaŭ. Jon jeździć pa ŭsim śviecie i pradstaŭlajecca jak kiraŭnik abjadnanaj partyi».
Haračyja batalii razharnulisia ŭ idealahičnaj sfery. «My pierš za ŭsio hramadoŭcy, a paśla ŭžo sacyjał-demakraty», — kaža Stanisłaŭ Šuškievič. «Hramadu z sacyjalizmam źviazvaje tolki nazva. Tut bolš histaryčnaj pierajemnaści, a jaje traktujuć jak klasyčnuju sacyjał-demakratyčnuju partyju», — padtrymlivaje jaho Viktar Sazonaŭ, staršynia Haradzienskaj abłasnoj arhanizacyi. Prychod u partyju novych siabroŭ, jakija majuć inšy pohlad na sacyjał-demakratyju, moža vyklikać palavieńnie BSDH. Hetaha nie žadajuć ciapierašnija hramadoŭcy, mnohija ź jakich trymajucca davoli pravych pohladaŭ. Tearetyk «karaloŭcaŭ» Anatol Sidarevič prapanuje ŭnieści źmieny ŭ statut Hramady, šerah pałažeńniaŭ jakoha supiarečyć samim pryncypam sacyjał-demakratyi. Šuškievič ža ličyć, što siońnia «ŭnosić źmieny ŭ statut vielmi niebiaśpiečna», dy pryvodzić prykład Eŭropy, dzie «adroźnieńnie pamiž pravymi i levymi vielmi i vielmi małoje». Vychodzić — tupik, i pakul niajasna, jak apanenty ź jaho vybierucca.
Partyjny źjezd musiŭ abmierkavać palityčny momant i taktyku dziejańniaŭ u siońniašniaj sytuacyi, pytańni staŭleńnia da vybaraŭ. Musili adbycca j pieravybary kiraŭnictva. Adnak źjezd byŭ adkładzieny. S.Šuškievič kaža, što zrabić heta prapanavali siabry partyi z Haradzienščyny i Homielščyny. Mahčyma, Šuškievič prosta vyrašyŭ uziać pieradyšku, kab pryniać pravilnaje rašeńnie ŭ niaprostaj sytuacyi.
Tym časam adna z byłych liderak niezarehistravanaj ASDP Valancina Palevikova razbudoŭvaje struktury svajoj novaj partyi. U červieni 2003 h. była zasnavanaja Biełaruskaja demakratyčnaja partyja (BDP), u jakuju ŭliłosia žanočaje kryło byłoj ASDP. «U biełaruskim hramadztvie isnuje nehatyŭnaje staŭleńnie da sacyjał-demakratyi, — havoryć Palevikova. — Tamu ŭ naźvie našaj partyi «sacyjał» źnikła, zastałasia adna «demakratyja»... Heta nia čysta žanočy prajekt: kala traciny siabroŭ BDP — mužčyny. U razmovie z karespandentam «NN» V.Palevikova pryznałasia, što pierakanałasia ŭ słušnaści hetaha kroku. Z «dvuchpołaj» partyjaj pracavać praściej. U Palevikovaj čatyry namieśniki: pradprymalnica Iryna Paladava, alpinistka Iryna Vialankova, biznes-vumen Alona Žuleha i prafsajuzny dziajač Stanisłaŭ Kałasoŭski. Adnak Miniust maŭčyć i rehistravać novuju partyju nie śpiašajecca.
Siarhiej Jorš
Kamientary