Kancert hodu

Viartańnie Kasi Kamockaj, abnoŭleny «Ŭlis», Kulinkovič pa-biełarusku, «Krama» ź śviežaj prahramaj, 30 kilavataŭ huku — na kancercie «Hienerały ajčynnaha roku».

25 krasavika Ladovy pałac akupujuć muzyki. Viadziecca nie pra tavaryskuju chakiejnuju sustreču «Rok suprać papsy» ci niešta inšaje takoha kštałtu. Kancert, jaki maje adbycca, pretenduje na zvańnie najbujniejšaje rok-akcyi apošnich hadoŭ. Doŭžycca jon budzie až čatyry hadziny i źbiare kala dvaccaci hurtoŭ. Ahulnaja mahutnaść aparatury dasiahnie 30 kilavataŭ — takim hukam možna zrujnavać jaki-niebudź nievialiki DK.

Kancert hodu budzie składacca z troch častak. Meta pieršaj, pavodle słovaŭ Źmitra Dajneki, što pradstaŭlaje fundatara akcyi, kampaniju «BiełPi», — patreniravać maładych biełaruskamoŭnych muzykaŭ. Kab upeŭniena pačuvalisia na prafesijnaj vialikaj scenie. Praz hałasavańnie na sajcie «Tuzin hitoŭ» (www. music.fromby.net) byli abranyja siem hrupaŭ, što voźmuć udzieł u kancercie, — «BN», «Harackija», «Partyzone», «Znich», «Kukły», «Ściana», «Tezaŭrus». Šlacham hladackaha hałasavańnia padčas festu (ankiety buduć razdavać na ŭvachodzie) vyznačać try najlepšyja ź ich. Za pieršaje miesca arhanizatary abiacajuć maładomu hurtu biaspłatny zapis albomu, za druhoje — prafesijna źniaty klip, za treciaje — darahi studyjny mikrafon.

Paśla maładych na scenie adyhrajuć hości festu — pradstaŭniki roznych stylovych płyniaŭ biełaruskaj muzyki. Siarod ich folkavy «Stary Olsa», bluzavy «P.L.A.N.», hardkoravy «Zet», padzabyty ŭžo «Ћygimont VAZA».

Treciaja častka kancertu — vystup hienerałaŭ, lehiendaŭ ajčynnaj rok-muzyki. Kožny hurt rychtuje siurpryz. Tak, «Nejra Dziubiel» prezentuje narešcie całkam biełaruskamoŭnuju prahramu «Tanki». Kulinkovič taksama pierakłaŭ na biełaruskuju movu hit «Belarus uber alles». Budzie «Krama» z novaj prahramaj «Byvaj, maja Radzima».

Vierniecca na scenu Kasia Kamockaja, kab praśpiavać staryja hity «Novaha Nieba». Tolki voś vystupać jana budzie chutčej za ŭsio solna.

Dla «Ŭlisu» hety kancert budzie raźvitańniem z bubnačom Alaksandram «Hansam» Bykavym, što pracavaŭ u hurcie 10 hadoŭ. Hans miarkuje zasiarodzicca na «Krambambuli». Słava Korań nie vyklučaje, što da hurtu dałučycca klavišnik ci dy-džej — «Ulis» vypraŭlajecca ŭ čarhovuju vandroŭku, na pošuki novaha hučańnia. «NRM» hetym kancertam skončyć biełaruska-polska-rasiejskaje turne. Upieršyniu ŭ hetym hodzie možna budzie pabačyć «Kryvi», jakich taksama zaličyli da hienerałaŭ.

Škada, što nia spraŭdzilisia nadziei choć na čatyry hadziny adradzić lehiendy 80—90-ch: «Bondu», «Miascovy čas» dy «Mroju». Arhanizatar kancertu Vital Supranovič kaža, što sami ŭdzielniki tych hurtoŭ nia nadta zacikaŭlenyja ŭ paŭstavańni z popiełu pierabudovy. Vakalist «MČ» Aleś Kuźmin za miažoj, Volskamu niama kali, a Varaškievič zadumaŭ paralelna z «Kramaj» prajekt «Cmok i małoje» — navošta zhadvać staroje... Tym nia mienš na dysku «Hienerały ajčynnaha roku», jaki prezentujuć na adnajmiennym kancercie, pieśni lehiendarnaje trojcy buduć. U składanku ŭvojduć taksama viadomyja i novyja tvory «tavaryšaŭ hienerałaŭ» i małodšych čynoŭ.

Dysk u padarunak atrymaje toj, chto nabudzie kvitok za 20 tysiačaŭ. Najtańniejšyja kvitki ŭ bakavyja sektary zali kaštujuć 8 tys., tancpoł — 10 tys.

Kancert u Ladovym, što na vuł. Prytyckaha, 27 (st.m.«Puškinskaja»), — heta probny šar. Kali jon projdzie paśpiachova, kali źbiare try tysiačy prychilnikaŭ, — zrobicca rehularnym. Hetkim «Basoviščam» i «Rok-karanacyjaj» u adnym flakonie. Vytrasajcie hamancy, fanaty: naš rok varty takoha festu.

Siarhiej Budkin

• 0
• 0
• 0
• 0
• 0
• 0
• 0
• 0