U biełarusaŭ adsutničaje zachodni kult jakasnaha dy kamfortnaha adpačynku, bo klasyčny biełarus — pracaholik, a nie hiedanist.
Navahradzki fest — źviano z łancuha tradycyjnych śviataŭ, što adnačasna ŭpryhožvajuć dy skoŭvajuć błakitnavokuju Biełaruś.
Siaredniaviečnyja mierapryjemstvy majuć trochabličnuju sutnaść. U ich prysutničajuć elementy savieckaha śviata, śvieckaje tusoŭki dy niaŭłoŭnaha rycarskaha duchu, jaki paśladoŭna rujnujecca niećviarozymi rycarami.
Amatarskija ŭ 1990-ch festy ciapier prydbali aficyjnaści (arhanizatarami źjaŭlajucca miascovyja ŭłady) j talerantnaści (poruč funkcyjanujuć milicyjanty dy nacyjanalisty). Napiaredadni ŭzdoŭž hałoŭnych vulic horadu pranosicca vichura dobraŭparadkavańnia, jakaja źmiataje niekanstytucyjnyja nadpisy sa ścien, kulturny słoj — z chodnikaŭ i bamžoŭ — z łavak. Paśla śviatkavańnia horad praz adsutnaść biaspłatnych prybiralniaŭ pieratvarajecca ŭ dzicia biaz pampersu.
Zachavalisia i inšyja zvyčai ščaślivaha savieckaha minułaha. Jak zabarona prodažu alkaholu (i astranamičnaja kolkaść čyrvanatvarych vałchviacoŭ «Kryžačku»). Abo raźmiaščeńnie kiempinhu za try kilametry ad horadu, pryčym adzinymi pakazalnikami źjaŭlajucca babulki-kazapaski.
Šašłyki pazirajuć z talerki schaładniełymi šmatkami Biełki dy Strełki, a kvołyja pšyki salutu vymušajuć čyrvanieć naščadkaŭ vynachodnika šmatstupieńčataje rakiety Kazimiera Siemianoviča. Zvykłaj stała adsutnaść zaŭždy abiacanaje siaredniaviečnaje kuchni. Achvočyja da łasinych hub dy krambambuli naviedvalniki vybirali pamiž blinami ź plastykavych talerak dy cybulnaj smažankaj u kaviarni sa ščarbatym posudam.
Hlabalisty ciešacca takimi kaštoŭnymi prajavami amerykanskaje kultury, jak koka-koła, papkorn, baloniki, bliskańnie japonskich kamer, skoki pad faneru ŭ styli «dyska ŭ Navinkach», a taksama nadzimanyja jarka-ružovyja humavyja rohi, jakija karcić ubačyć na hałovach plamistych abaroncaŭ paradku.
Poŭnaściu hety artykuł možna pračytać u papiarovaj i pdf-versii "Našaj Nivy"
Bołačka
Kamientary