Pa tym, jakim čynam vyrašyć Łukašenka pavinšavać patryjarcha rasiejskaj palityki, možna budzie mierkavać i pra ciapierašni stan adnosin Miensku z Kramlom.
29 kastryčnika spaŭniajecca 75 hod z dnia naradžeńnia Jaŭhiena Prymakova. Z hetaj nahody ŭ rasiejskich i inšych ŚMI źjavilisia roznaha rodu materyjały. Bijahrafija jubilara i jahonaja palityčnaja karjera nastolki nasyčany cikavymi padziejami, što pisać i havaryć pra Prymakova-žurnalista, raźviedčyka, vučonaha, dyplamata i vydatnaha palityka ŭjaŭlajecca spravaj nia vielmi ciažkaj. Adnak, dumajecca, naŭrad ci ŭ vialikaj zamiežnaj presie možna budzie sustreć u hetyja dni apisańni roli Prymakova ŭ rasiejska-biełaruskich adnosinach časoŭ Łukašenkavaha praŭleńnia. A rola hetaja vielmi značnaja.
Kali ŭ Biełarusi zdarylisia pieršyja prezydenckija vybary, Jaŭhien Prymakoŭ byŭ dyrektaram Słužby zamiežnaj raźviedki (SZR). Ahulnaviadoma, što ŭ bytnaść Prymakova na hetaj pasadzie ŭ SZR uzmacniłasia infarmacyjna-analityčnaja sfera dziejnaści. I tam naŭrad ci mahli pramarhać prychod u 1994 h. da ŭłady ŭ Biełarusi zvyčajnaha dyrektara saŭhasu z deputackim mandatam, jaki peryjadyčna šumieŭ u Avalnaj zali biełaruskaha parlamentu. Paśla pieršaha referendumu ŭ traŭni 1995 h., jaki admianiŭ nacyjanalnuju symboliku i abviaściŭ intehracyju z Rasiejaj, Vasil Bykaŭ niejak skazaŭ, što biełarusy vybrali rezydenta, a nie svajho prezydenta. Što da zamiežnaj palityki, dyk Łukašenka ŭziaŭ vyrazny antyamerykanski, antyzachodni kurs. I ŭziaŭsia raźvivać ciesnyja stasunki z režymami krain arabskaha Ŭschodu. Takaja palityka całkam adpaviadała śvietaadčuvańniu Prymakova, jaki zrabiŭsia ŭ studzieni 1996 h. ministram zamiežnych spraŭ Rasiei ŭ kabinecie Viktara Čarnamyrdzina. Uznačaliŭšy MZS, Prymakoŭ na ŭvieś hołas staŭ prapahandavać ideju šmatpalarnaha śvietu ŭ procivahu amerykanskaj hiehiemonii. U rytorycy na hetuju temu mienskija stratehi staralisia jamu nie sastupać. Praŭda, u adroźnieńnie ad svajho premjera, Prymakoŭ vosieńniu 1996 h. u Miensku nie źjaŭlaŭsia. U Biełarusi dobra pamiatajuć, jak Čarnamyrdzin sa śpikierami abiedźviuch pałat rasiejskaha parlamentu zdali paśla druhoha referendumu naiŭnaha staršyniu Viarchoŭnaha Savietu Šareckaha, jaki tak spadziavaŭsia tady na dapamohu Maskvy ŭ spravie ŭcichamirvańnia Łukašenki. Daśviedčanyja ludzi kažuć, što da biełaruskaha «miunchienu» pryčyniŭsia i aŭtarytetny kiraŭnik rasiejskaha MZS.
Treba mierkavać, davoli mocny pryliŭ entuzijazmu Łukašenka adčuvaŭ, kali Prymakoŭ zrabiŭsia premjer-ministram. Pry hetym mała chto pamiataje, što jaho kandydaturu prapanavała frakcyja «JABŁyk». Jaŭlinski i jahonyja paplečniki nikoli nia mieli sympatyj da Łukašenki. Tym nia mienš, biełaruski dyktatar usio čaściej staŭ nazyvać Prymakova svaim nastaŭnikam.
Jak žartavali dyplamaty, vidać, antyamerykanski Prymakoŭ i navučyŭ Łukašenku tamu, kab toj vyhnaŭ zachodnich, a zaadno i astatnich pasłoŭ ź ich rezydencyj u Drazdach. Heta ŭžo paźniej, padčas juhasłaŭskaha kryzisu, Prymakoŭ sam kalamburyŭ, razvaročvajučy ŭ niebie samalot, jaki lacieŭ u Vašynhton. A jahony biełaruski vučań i naahuł asabista lotaŭ u Białhrad da asudžanaha Miłošaviča. Što zrabiłasia potym z hetych salidaryścich namahańniaŭ, viadoma. Miłošaviča pieravieźli ŭ Haahu, a Jelcyn hruba pieramiaściŭ Prymakova z maskoŭskaha Biełaha domu na pensiju. Mienavita ŭzrostavyja parametry patryjarcha rasiejskaj palityki Prymakova, jakomu pradkazvali i prezydenckaje kresła, całkam zadavalniali Łukašenku, što imknuŭsia za Prymakovym tudy ž, u Kreml.
Poŭnaściu hety artykuł možna pračytać u papiarovaj i pdf-versii "Našaj Nivy"
Raman Jakaŭleŭski
Ciapier čytajuć
Ad pryvatnikaŭ patrabujuć zavieści ideołaha ŭ štacie — raspytali, što robiać kampanii17
Kamientary