Премии «Золотой апостроф» удостоены Дубовец, Сильнова и Найденов
9 февраля в минском баре «ДК» состоялось награждение лауреатов литературной премии «Золотой апостроф»-2014.
Сёлета лаўрэатамі прэміі, якая традыцыйна адзначае найлепшыя публікацыі ў часопісе «Дзеяслоў» за год і праводзіцца ўжо ў дванаццаты раз, сталі: у паэзіі Людка Сільнова, у прозе Сяргей Дубавец, у намінацыі «Дэбют» Мікіта Найдзёнаў. Спецыяльнай прэміяй Алеся Усені за ўнёсак у развіццё сучаснай беларускай літаратуры ўганараваны Народны паэт Беларусі Ніл Гілевіч.
Урачыстая цырымонія была арганізаваная ГА «Саюз беларускіх пісьменнікаў» і прайшла ў межах грамадскай культурніцкай кампаніі «Будзьма беларусамі».
— Адметнасць сёлетняй прэміі ў тым, што не абвяшчалася інтэрнэт-галасаванка, і рэдакцыя «Дзеяслова» сама абірала лаўрэатаў, склаўшы адразу шорт-ліст, – распавёў Старшыня ГА «Саюз беларускіх пісьменнікаў», галоўны рэдактар часопіса «Дзеяслоў» Барыс Пятровіч. — За 12 гадоў існавання «Залатога апострафа» былі ўганараваныя каля сарака чалавек. Першапачаткова было вырашана, што лаўрэатам прэміі можна станавіцца толькі адзін раз. Аднак цяпер мы бачым, наколькі цікавыя новыя творы з’яўляюцца ў нашых некалі ўжо ўзнагароджаных аўтараў, і, магчыма, з наступнага года мы памяняем правілы. Хацелася б дадаць, што адна з нашых намінацый – дэбютная – носіць імя Анатоля Сыса.
Вядучы вечара, адказны сакратар часопіса «Дзеяслоў» Анатоль Івашчанка прадставіў першага намесніка старшыні СБП Алеся Пашкевіча, які абвясціў намінантаў прэміі ў галіне прозы.
Лаўрэатам стаў Сяргей Дубавец за публікацыю «Вайна і мір. Справаздача» ў № 71.
Музычную частку вечара склалі выступленні ўдзельнікаў дзеяслоўскай Анталогіі перакладаў расійскай рок-паэзіі (№ 69).
Так, Арцём Сітнікаў і Вікторыя Багданава выканалі па-беларуску песні Барыса Грэбеншчыкова. Раман Яраш праспяваў як аўтарскую песню, так і музычную інтэрпрэтацыю па матывах гімна «Магутны Божа». Творчасць БГ па-свойму пераасэнсавалі ў супольным выступе Анатоль Івашчанка і Уладзімір Дрындрожык.
Барыс Пятровіч распавёў гледачам пра стварэнне самага першага нумара часопіса «Дзеяслоў» і абвесціў лаўрэата «Залатога апострафа» ў галіне паэзіі – Людку Сільнову (публікацыя ў № 69).
Паэт, перакладчык, Старшыня Беларускага ПЭН-цэнтра, колішні лаўрэат прэміі Андрэй Хадановіч праспяваў «Арландыну» і песню Уладзіміра Высоцкага па-беларуску.
Спадар Андрэй запрасіў усіх на IV Міжнародны паэтычны фестываль імя Міхася Стральцова з удзелам гасцей з Літвы, Латвіі, Нарвегіі, Швецыі, Украіны, Польшчы, які стартуе 12 лютага. Выступоўца зачытаў свае пераклады літоўскага паэта Гінтараса Граяўскаса і ўкраінскага Сергія Жадана, якія неўзабаве прыедуць на фэст.
Спецыяльнай прэміяй Алеся Усені за вялікі ўнёсак у развіццё сучаснай беларускай літаратуры ўганараваны Ніл Гілевіч. За Ніла Сымонавіча, які па хваробе не змог прыйсці, узнагароду атрымаў яго сын Сяргей.
На вечарыне таксама выступілі пісьменнікі, лаўрэаты «Залатога апострафа» розных гадоў Алесь Бяляцкі, Анатоль Вярцінскі, Леанід Дранько-Майсюк, Уладзімер Някляеў. Якраз Уладзімер Пракопавіч і абвесціў сёлетняга лаўрэата ў намінацыі «Дэбют», паэта Мікіту Найдзёнава (апублікаваны ў № 73).
Напрыканцы імпрэзы ўсе жадаючыя змаглі атрымаць часопісы «Дзеяслоў» з аўтографамі аўтараў.
Комментарии