Месцамі слупок тэрмометра апусціцца да мінус 27 градусаў.
Гэты тыдзень у Беларусі будзе характарызавацца вельмі халодным і марозным надвор’ем,
паведаміла галоўны сіноптык Рэспубліканскага гідраметэацэнтра Вольга Фядотава.
Пад уплывам сібірскага антыцыклону, які захапіў уладу над нашай гаротнай бацькаўшчынай, моцныя маразы пакуль захаваюцца. Істотных ападкаў не чакаецца. Месцамі ў паўднёва‑заходніх раёнах магчымы невялікі снег. На асобных участках дарог галалёдзіца. Вецер усходні, парывісты.
Тэмпература паветра будзе вагацца ад 11 да 18 градусаў марозу. У паўднёва‑заходніх раёнах слупок тэрмометра пакажа 7‑10 градусаў ніжэй за нуль.
Асабліва сцюдзёна будзе ў паўночна‑ўсходняй частцы краіны — у ноч на 19 студзеня там чакаецца мінус 20‑26 градусаў.
Халоднае надвор’е захаваецца і ў сярэдзіне тыдня. У чацвер, 21 студзеня, на тэрыторыю Беларусі пачнуць паступаць больш вільготныя паветраныя масы, якія прынясуць невялікія ападкі — месцамі пройдзе непрацяглы снег. Уначы ў паўднёва‑заходніх раёнах чакаецца 10 градусаў марозу. На паўночным усходзе краіны слупок тэрмометра пакажа 25 градусаў ніжэй за нуль. Тэмпература паветра ў дзённыя гадзіны будзе вагацца ад 8 да 15 градусаў марозу.
У канцы тыдня ўлада над надвор’ем возьме чарговы антыцыклон, таму 23 і 24 студзеня ў асобных раёнах чакаецца невялікі снег. Тэмпература паветра па‑ранейшаму будзе нізкай. Ноччу чакаецца 13‑20 градусаў марозу,
пры праясненнях — мінус 22‑27. Днём слупок тэрмометра пакажа ад 9 да 18 градусаў ніжэй за нуль.
Па словах Вольгі Фядотавай, такі тэмпературны рэжым на 7‑12 градусаў халадней, чым звычайны.
Каментары