«Мінсктранс» пераклаў праязныя на расейскую мову

У першы дзень 2013 года мінчукі паедуць па расейскамоўных праязных. У кіёсках «Мінсктранса» ўсе праязныя на студзень — і месячныя, і дэкадныя, і паўмесячныя — аформленыя па-расейску.

Як паведамілі «НН» у «Мінсктрансе», праязныя цяпер будуць друкавацца па-расейску, бо «нарматыўны дакумент, які рэгуляваў тарыфы на праезд у грамадскім транспарце, быў перакладзены на расейскую мову, і мова тэксту на праязных павінна адпавядаць мове гэтага акта». Чаму і хто пераклаў на расейскую мову сам акт, спецыяліст «Мінтранса» патлумачыць адмовілася, спаслаўшыся на занятасць.

У «Мінтрансе» раяць усе пытанні і заўвагі дасылаць у пісьмовай форме. Можна даслаць электронны ліст на [email protected] ці праз форму зваротнай сувязі для фізічных і юрыдычных асоб.

Адрас прадпрыемства для ліставання: 220007, г. Мінск, зав. Кааператыўны, 12.

Можна звяртацца ў КУП «Мінсктранс» і па тэлефоне (+37517) 219-86-01 ці па факсе (+37517) 222-98-84.

Журналіст Сяргей Будкін пранаваў наступны ўзор для ліста:

«Добры дзень! Мяне ўсхвалявала навіна пра тое, што праязныя з 2013 году аформленыя па-руску. Хацелася б выказаць пажаданне, каб засталося афармленне па-беларуску. Бо мы ж у Беларусі з Вамі жывем, а не ў Расіі…»

* * *

А вось такі варыянт сфармуляваў Андрусь Клікуноў:

Шаноўнае спадарства!

Мяне, бацьку сям'і, у якой выхаванне патрыятызму і любові да сваёй радзімы Беларусі аддаецца важнае месца, глыбока абурыла навіна пра тое, што праязныя білеты "Мінтранс" з 2013 года будуць афармляцца на рускай мове.

Як грамадзянін Рэспублікі Беларусь, прашу ўлічыць канстытуцыйнае права мяне і членаў маёй шматдзетнай сям'і на атрыманне інфармацыі ў Беларусі на роднай для нас беларускай мове. Мове нашых продкаў. Прашу вас не патураць гэтае ЗАКОННАЕ права, выпакутаванае пакаленнямі маіх бацькоў і дзядоў.

Адпаведна, ад імя маёй шматдзетнай сям'і прашу вас:

1. Працягнуць афармленне праязных білетаў на беларускай мове.

2. Распрацаваць беларускамоўную версію вашага Інтэрнэт-сайта, уключна з функцыяй пошуку і аргументавана патлумачыць, чаму дагэтуль гэта не было зроблена. Чаму парушаюцца лінгвістычныя правы мільёнаў беларускамоўных беларусаў? Мы спраўна аплочваем праезд у грамадскім транспарце. Чаму не ўлічваюцца інтарэсы спажыўца паслуг вашага прадпрыемства, ДЗЯРЖАЎНАГА манапаліста ў сваёй сферы?

Чакаем на ваш адказ па сутнасці ў вызначаны законам тэрмін.

* * *

Дапаўняйце шаблоны і лістуйце ў «Мінсктранс».

• 0
• 0
• 0
• 0
• 0
• 0
• 0
• 0