Урад і Нацбанк зацвердзілі план дзеянняў на 2013 год

Савет міністраў і Нацыянальны банк зацвердзілі план дзеянняў па дасягненні параметраў прагнозу сацыяльна-эканамічнага развіцця, выкананні бюджэту і рэалізацыі Асноўных кірункаў грашова-крэдытнай палітыкі на 2013 год.

Адпаведнае рашэнне ўтрымліваецца ў сумеснай пастанове ад 13 снежня 2012 года № 1150/17, паведамляе прэс-служба ўрада.

План прадугледжвае меры для паляпшэння інвестыцыйнага клімату, стымулявання мадэрнізацыі эканомікі, стварэння высокатэхналагічных вытворчасцяў, развіцця малога і сярэдняга прадпрымальніцтва.

У прыватнасці, праца з замежнымі інвестарамі і беларускімі юрыдычнымі асобамі будзе арганізавана згодна з прынцыпам «адно акно».

Асаблівая ўвага ў плане нададзена мерапрыемствам па зніжэнні імпартаёмістасці эканомікі за кошт павышэння энергаэфектыўнасці, зніжэння матэрыялаёмістасці, а таксама забеспячэння беражлівасці.

Будуць рэалізаваны мерапрыемствы па развіцці фондавага рынку, яго інфраструктуры і інструментаў.

Прадугледжаны таксама меры ў галіне грашова-крэдытнай палітыкі, адміністрацыйнага і цэнавога рэгулявання, скіраваныя на абмежаванне інфляцыі.

Акрамя таго, плануецца стварэнне асобнага незалежнага антыманапольнага органа ў межах працы па рэфармаванні сістэмы дзяржорганаў.

Плануецца скараціць пералік відаў дзейнасці, якія падлягаюць ліцэнзаванню, спрасціць парадак выдачы ліцэнзій.

Прадугледжана цэнтралізацыя крэдытавання дзяржпраграм і мерапрыемстваў праз ААТ «Банк развіцця Рэспублікі Беларусь».

Усяго ў плане 27 пазіцый.

***

Нагадаем, савет дырэктараў Міжнароднага валютнага фонду ў сваёй снежаньскай ацэнцы сітуацыі ў эканоміцы Беларусі адзначыў, што яе арыентуюць не несумяшчальныя мэты. МВФ указаў, што ўлады аслабілі грашова-крэдытную палітыку і дапусцілі паскораны рост зарплаты, што ў сукупнасці з планамі паскоранага росту ВУП можа прывесці да аслаблення плацежнага балансу, узмацнення інфляцыі і стварыць пагрозу для ўстойлівасці пазыковай сітуацыі.

Як нагадвае МВФ, улады Беларусі заявілі пра сваю рашучасць знізіць у 2013 годзе інфляцыю да 12%, палепшыць сальда плацежнага балансу і павялічыць рэзервы. Аднак пры гэтым яны аб’явілі прагнозны паказчык прыросту ВУП на 8,5%, што несумяшчальна з гэтымі мэтамі.

«З прычыны ўзмацнення рызык для эканамічных перспектыў» савет дырэктараў МВФ рэкамендаваў Нацыянальнаму банку Беларусі без прамаруджвання ўзмацніць жорсткасць курсу грашова-крэдытнай палітыкі і ўмовы ліквіднасці.

Паводле ацэнкі Савета дырэктараў МВФ, правядзенне ў Беларусі «глыбокіх структурных рэформ застаецца надзённай умовай павышэння прадукцыйнасці, узмацнення канкурэнтаздольнасці і стымулявання патэнцыяльнага росту».

Прыярытэтнымі задачамі эксперты фонду называюць лібералізацыю цэн, рэформу прадпрыемстваў і прыватызацыю. Для падтрымкі ўразлівых слаёў насельніцтва МВФ рэкамендуе стварыць адрасныя сістэмы сацыяльнай абароны.

• 0
• 0
• 0
• 0
• 0
• 0
• 0
• 0