У метро пабілі легенду Мінска — жанчыну, якая шмат гадоў спявае пра Ісуса
Ніхто не ўмяшаўся, каб заступіцца за спявачку.
Валянціну, бадай, ведае кожны, хто пражыў у беларускай сталіцы хаця б месяц. Жанчына спявае пра Ісуса каля метро — і ніколі не просіць грошай, у адрозненне ад звычайных вулічных спевакоў. Яна заўсёды на пазітыве. Спявачку называюць легендай сталіцы.
Але нядаўна Валянціна трапіла ў жудасную сітуацыю.
Пра тое, што здарылася, распавяла ў інстаграме Вольга Мамантава. Валянціну яна сустрэла ў метро на «Кастрычніцкай». Як і заўсёды, тая спявала пра Ісуса — але твар жанчыны быў у крыві.
Вольга падышла да спявачкі, каб дапамагчы прывесці сябе ў парадак. Валянціна расказала, што ехала ў вагоне і спявала, калі на «Плошчы Леніна» адзін з маладых мужчын устаў і ўдарыў яе кулаком у твар — трапіў у нос. А потым спакойна сеў назад на сваё месца.
Больш за ўсё ў гэтай гісторыі Вольгу ўразіла тое, што ніхто з іншых людзей не прыйшоў на дапамогу жанчыне сталага ўзросту — ні ў вагоне метро, ні потым на станцыі, дзе яна была з акрываўленым тварам.
Неабыякавая беларуска прапанавала спявачцы напісаць заяву ў міліцыю — і нават прапанавала пайсці разам. Тая спачатку пагадзілася, але толькі пасля працы — бо зранку Валянціна якраз ехала на змену. Да дактароў яна таксама пайшла толькі калі скончыла працаваць.
А ўжо ўвечары, калі Вольга патэлефанавала спявачцы зноў, Валянціна сказала, што не будзе звяртацца да сілавікоў: «Я вырашыла не пісаць заявы, я даравала і мне так добра стала. Над намі ўсімі ёсць суддзя, і гэта не я. Я буду маліцца…».
Відэа пра здарэнне менш чым за суткі набрала 200 тысяч праглядаў і сотні каментароў. Шмат хто абураецца абыякавасцю беларусаў, якія не толькі не адрэагавалі на сам момант збіцця, але і ігнаравалі жанчыну ў крыві, якая спявала пасярод платформы адной з самых загружаных станцый мінскага метро.
Каментары
вагон метро, гэта такое месца, дзе людзі сціснутыя, і церпяць адно аднаго з апошніх сіл.