Януковіч закрыў магчымасць еўраінтэграцыі для Украіны на шмат гадоў і вырашыў лёс усёй Усходняй Еўропы на 20-25 гадоў наперад. Такое меркаванне ў каментары інтэрнэт-парталу «Украінская праўда» выказала асоба з атачэння Фюле, еўракамісара, адказнага за пашырэнне ЕС.
Крыніца была блізкая да перамоваў з украінскім бокам па падрыхтоўцы да падпісання Дамовы аб асацыяцыі з ЕС. «Гэта замарожванне адносін Украіны з ЕС. Не факт, што калісьці ў блізкай перспектыве можна будзе вярнуцца да перамоваў з Украінай аб асацыяцыі. На самой справе Януковіч закрыў магчымасць еўраінтэграцыі для Украіны на шмат гадоў, а можа, нават вырашыў лёс Усходняй Еўропы на 20-25 гадоў і замарозіў усе працэсы, якія маглі тут адбывацца, у тым ліку рэформы, дэмакратызацыю, еўрапеізацыю і г.д.», – заявіла крыніца.
Каментуючы адмову ўрада Украіны працягнуць падрыхтоўку да падпісання Асацыяцыі з ЕС, ён падкрэсліў, што «адзіным чалавекам, ад якога залежаў лёс Асацыяцыі быў Януковіч». Па словах крыніцы, Януковіч «ведаў, што ЕС быў гатовы на кампраміс у пытанні Цімашэнкі». Крыніца сцвярджае, што для падпісання было дастаткова прыняць 2-3 еўразаконы, напрыклад, пра выбары і пракуратуру.
«У панядзелак падчас пасяджэння савета міністраў ЕС ніхто адкрыта не выступіў супраць. І нават скептыкі давалі зразумець, што яны будуць галасаваць за асацыяцыю з Украінай, бо Цімашэнка пераканала еўрапейскіх лідараў не зважаць на яе, і ў заходніх лідараў ёсць яе ліст аб гэтым», – распавяла крыніца.
«Нават тыя краіны, якія публічна выступалі супраць, згаджаліся станоўча прагаласаваць», – дадаў ён.
Яшчэ ў аўторак Януковіч паведаміў Фюле аб адмове падпісваць пагадненне аб Асацыяцыі і прасіў адкласці Асацыяцыю на год. Ён патлумачыў гэта ціскам Расеі і вельмі высокім коштам адаптацыі Пагаднення, называў суму ў 160 млрд даляраў за 15 гадоў.
Фюле ж слаба зразумеў украінскага прэзідэнта, піша «Украінская праўда».
«Фюле падумаў, што ўкраінскі прэзідэнт або сапраўды адмовіўся ад ідэі падпісання, або проста таргуецца. Але надзея яшчэ была, гэтым і было выклікана яго аптымістычнае паведамленне па выніках сустрэчы», – паведаміла крыніца.
«З пункту гледжання інтарэсаў Украіны Януковіч даволі дзіўна павёў сябе, мякка кажучы. Нават калі казаць пра эканамічныя аргументы, ён атрымаў гарантыі і абяцанні вельмі вялікай падтрымкі і з боку ЕС, і з боку ЗША. Я думаю, што сумы супастаўныя з тым, што прапаноўвала Расія», — лічыць крыніца.
У 2010 годзе пасля перыяду эканамічнага і інфармацыйнага ціску Расія змусіла Аляксандра Лукашэнку падпісаць дамову пра Мытны саюз, а пасля і пра Адзіную эканамічную прастору.
Раней у 2013 годзе ад планаў збліжэння з Еўрасаюзам адмовілася Арменія — на карысць Мытнага саюза.
Цвёрда праеўрапейскім шляхам ідзе маленькая і аддаленая ад Расіі Малдова, а таксама Грузія, палітыку якой змяніў харызматычны прэзідэнт Саакашвілі. Дыстанцыю ад Расіі захоўвае аўтарытарны і багаты на нафту й газ Азербайджан.