ААТ «Газпром» не пакідае Беларусь і выканае абавязацельствы наконт будаўніцтва ў Мінску офіснага цэнтра на месцы знесенага аўтавакзала «Маскоўскі» і развязкі на скрыжаванні праспекта Незалежнасці і вуліцы Філімонава.
Аб гэтым у эфіры тэлеканала АНТ заявіў прэс-сакратар кампаніі Сяргей Купрыянаў.
«Мяркуючы па той колькасці пытанняў, якія нам задаюць, склалася памылковае ўражанне адносна таго, што ўяўляе сабой прадстаўніцтва «Газпрома» ў Мінску. Робіцца выснова, што мы пакідаем Беларусь, што зусім не так», - канстатаваў Сяргей Купрыянаў. Паводле яго слоў, прадстаўніцтва кампаніі ў Мінску працавала даволі даўно, яшчэ да таго, як «Белтрансгаз» увайшоў у склад «Газпрома». «Цяпер гэта 100 працэнтаў наша даччыная кампанія пад назвай «Газпром трансгаз Беларусь», і ўсе бізнес-функцыі сканцэнтраваны менавіта там. Неабходнасці ўтрымліваць яшчэ і прадстаўніцтва няма», - растлумачыў Сяргей Купрыянаў.
Што датычыцца ўзятых «Газпромам» абавязацельстваў наконт будаўніцтва ў Мінску офіснага цэнтра на месцы знесенага аўтавакзала «Маскоўскі» і развязкі на скрыжаванні праспекта Незалежнасці і вуліцы Філімонава Сяргей Купрыянаў адзначыў, што яны будуць поўнасцю выкананы. «Ніякія нашы стратэгічныя доўгатэрміновыя планы ў Беларусі не змяняюцца. Гэта ніяк не паўплывае на нашы планы наконт будаўніцтва буйнога офіснага цэнтра ў Мінску. Сказалі нам пабудаваць, значыць, пабудуем», - падкрэсліў ён.
Інфармацыю пацвердзіў і старшыня Мінгарвыканкама Андрэй Шорац. «Я не праводжу паралелі і не звязваю ліквідацыю прадстаўніцтва і нашу сумесную работу. У нас будзе і развязка, і вышынны будынак», - канстатаваў мэр беларускай сталіцы.
