Змены ў законы аб прадпрымальніцтве закрануць каля 40 тысяч ІП — Мінэканомікі
Змяненні ў законы аб прадпрымальніцтве закрануць каля 40 тысяч індывідуальных прадпрымальнікаў. Пра гэта на прэс-канферэнцыі заявіў намеснік міністра эканомікі Уладзімір Навумовіч, піша reform.news.
Згодна з нядаўна прынятым законам, ІП змогуць займацца толькі відамі дзейнасці, якія будуць уключаны ў пералік урада. Саўмін павінен зацвердзіць яго да 1 ліпеня. Пакуль дакумент знаходзіцца на стадыі распрацоўкі. 15 мая яго павінны вынесці на грамадскае абмеркаванне.
«Арыентыровачна на сёння можна толькі казаць пра нейкія лічбы з улікам таго, што пералікі не зацверджаныя. На думку Мінэканомікі, пытанне закране каля 40 тысяч індывідуальных прадпрымальнікаў», — сказаў Навумовіч.
У міністэрстве таксама чакаюць, што трансфармацыя з ІП у юрыдычныя асобы, якая будзе ісці ў спрошчаным парадку, патэнцыйна можа павялічыць даходы бюджэту.
«Калі гэтая катэгорыя індывідуальных прадпрымальнікаў умоўна застанецца індывідуальнымі прадпрымальнікамі, гаворка ў частцы напаўнення бюджэту будзе ісці аб суме каля 150 млн рублёў. Калі гэтыя віды дзейнасці трансфармуюцца на сённяшні дзень у форму юрыдычнай асобы, то такі ж суб'ектны склад у форме юрыдычных асоб сёння выплачвае каля 440 млн рублёў», — растлумачыў Навумовіч.
Падчас прэс-канферэнцыі першы намеснік міністра фінансаў Дзмітрый Кійко адзначыў, што за два гады малое прадпрымальніцтва ўжо павялічыла ўклад у фармаванне бюджэтаў усіх узроўняў на 600 млн рублёў у выніку падатковых змен.
«Будзе адбывацца зараз трансфармацыя індывідуальных прадпрымальнікаў, шэраг працягне сваю дзейнасць, што будуць адпавядаць відам дзейнасці, якія змяшчаюцца ў пераліку, частка будзе ліквідаваная, калі не будзе жадання пераходзіць у камерцыйную арганізацыю і, адпаведна, частка працягне працу ў выглядзе камерцыйнай арганізацыі. Мы не бачым тут нейкіх значных сур'ёзных наступстваў для бюджэту ў частцы страт даходу, але і не чакаем значнага, прарыўнога паступлення дадатковых сродкаў, таму што не мэта гэтага закона фіскальныя наступствы», — сказаў Зміцер Кійко.
Цяпер чытаюць
У Быхаве паставілі выродлівы помнік жанчыне. Разам са скульптурай у Касцюковічах ён можа стаць сімвалам культурнай дэградацыі Беларусі пры Лукашэнку32
Каментары