26 сакавіка ў судзе Маскоўскага раёна г. Брэста адбыўся разгляд адміністрацыйнай справы ў дачыненні да сябра ГА «БАЖ» Алеся Ляўчука. Вынікі сталі вядомыя сёння. Як паведаміў А. Ляўчук у сваім фэйсбуку, ён аштрафаваны на 21 базавую велічыню (3,78 млн рублёў).
Пра тое, што суд мае адбыцца менавіта ў гэты дзень, журналіста папярэдзілі ў міліцыі 18 сакавіка – тады ўчастковы інспектар Маскоўскага РАУС г. Брэста, капітан міліцыі Раман Трафімук склаў адміністрацыйны пратакол на журналіста за парушэнне ч. 2 арт. 22.9 КаАП.
Падставай для завядзення адміністрацыйнай справы стаў матэрыял на сайце «Белсата» за подпісам «АЛ». Участковы меў пры сабе раздрукоўкі гэтага ды іншых матэрыялаў з сайта, а таксама закона «Аб СМІ». Са словаў міліцыянта вынікала, што аўтарства Алеся Ляўчука нібыта пацвердзіла міліцыі суразмоўца журналіста.
«Калі мае адбыцца судовае паседжанне, вырашае суд, а не міліцыя, – падкрэсліў у гутарцы са службай маніторынгу ГА «Беларуская асацыяцыя журналістаў» Алесь Ляўчук. – Ніякай позвы я не атрымаў і пра час разгляду справы ня ведаў. Калі я патэлефанаваў у суд Маскоўскага раёна, то высветліў, што справу разглядалі без майго ўдзелу. Пры гэтым і мне, і іншым журналістам у судзе адмовіліся даваць інфармацыю пра прынятае рашэнне. Мяркую, што праз пару дзён я даведаюся, што мяне пакаралі чарговым штрафам»
Цяпер чытаюць
Аляксандр Лукашэнка так ляснуўся на лёд на хакеі, што трыбуны замерлі ВІДЭА124
Каментары