Ва Украіне яшчэ адна гучная карупцыйная справа. Сярод падазраваных — дэпутаты «Слугі народа»
Паводле звестак следства, удзельнікі групы атрымлівалі неправамерную выгаду за галасаванне ў Вярхоўнай Радзе Украіны.
Ва Украіне яшчэ адна гучная карупцыйная справа. 27 снежня Нацыянальнае антыкарупцыйнае бюро Украіны (НАБУ) і Спецыялізаваная антыкарупцыйная пракуратура (САП) паведамілі, што правялі аперацыю пад прыкрыццём і выкрылі арганізаваную злачынную групу, у склад якой уваходзілі дзейныя народныя дэпутаты Украіны. Паводле звестак следства, удзельнікі групы на сістэматычнай аснове атрымлівалі неправамерную выгаду за галасаванне ў Вярхоўнай Радзе Украіны.
Паводле звестак крыніц «Украінскай праўды», падазрэнні ўжо атрымалі народныя дэпутаты ад «Слугі народа» Яўген Півавараў, Ігар Негулеўскі, Вольга Саўчанка і Юрый Кісель, але могуць быць і іншыя падазрэнні.
У той жа час выданне Zn.ua паведамляе пра падазрэнні толькі тром нардэпам — Півавараву, Нкгулеўскаму і Кісялю паводле арт. 368 Крымінальнага кодэкса Украіны (прыняцце прапановы, абяцання або атрыманне неправамернай выгады службовай асобай).
Як піша выданне, у пастанове, акрамя артыкула 368, былі таксама пазначаныя артыкулы 255 (стварэнне, кіраванне злачыннай супольнасцю або злачыннай арганізацыяй, а таксама ўдзел у ёй) і 369 (прапанова, абяцанне або спрыянне ў неправамернай выгадзе службовай асобе).
11 снежня паведамлялася пра праслухоўванне ў офісе дэпутата «Слугі народа» Юрыя Кісяля, дзякуючы якому НАБУ змагло зафіксаваць яго канфідэнцыйныя кантакты не толькі з былым першым памочнікам прэзідэнта Сяргеем Шэфірам, але і з іншымі шматлікімі высокапастаўленымі чыноўнікамі. Крыніцы Zn.ua распавялі, што дэтэктывы выйшлі на «касавае акно», дзе дэпутаты «Слугі народа» атрымлівалі ценявыя выплаты.
Як піша выданне, справу пра гэта НАБУ расследавала яшчэ тады, калі яго дырэктарам быў Арцём Сытнік. Тады цяпер загінулы дэпутат Антон Палякоў паведаміў, што дэпутатам партыі плацяць заробкі ў канвертах: па 5 тысяч даляраў — звычайным парламентарыям, і па 10—15 тысяч — старшыням і намеснікам старшыняў камітэтаў. Праз некаторы час НАБУ выбіла з гульні касіра ўгоды — Аляксандра Трухіна.
Цяпер чытаюць
Дзе была зніклая Яна ў свой апошні дзень і дзе яе знайшлі КАРТА1
Каментары