Украінскі палітолаг: Дроны могуць нечакана прыляцець і ў мінскі аэрапорт, і на нафтаперапрацоўчыя заводы
«Украіна не зацікаўленая ў тым, каб даваць падставу для вайны, але гэта не азначае, што ў Лукашэнкі няма ўразлівых месцаў».
Украінскі палітолаг Яўген Магда ў каментары «Белсату» заявіў: цяперашняя палітыка Аляксандра Лукашэнкі звязаная з тым, што ён адчувае індульгенцыю, якую нібыта атрымаў на фоне кантактаў са Злучанымі Штатамі.
«Я бачу наступныя прычыны нахабства Лукашэнкі. Ён, відавочна, успрымае свой дыялог са Злучанымі Штатамі як дастатковую індульгенцыю для таго, каб быць адначасова і партнёрам ЗША ў перамовах і, адпаведна, узаемадзейнічаць з Расеяй, дапамагаць ёй абыходзіць украінскую абарону і заставацца ў ролі суагрэсара», — сказаў Яўген Магда.
Паводле ягоных словаў, Аляксандр Лукашэнка разлічвае на тое, што Украіна ўстрымаецца ад дзеянняў у адказ.
«Лукашэнка, я думаю, спрабаваў заручыцца гарантыямі з боку Злучаных Штатаў на тэму таго, што Украіна не будзе адказваць. Але мы жывём у свеце, дзе вандроўныя дроны могуць нечакана прыляцець і ў мінскі аэрапорт, і на нафтаперапрацоўчыя заводы, і нават раптам апынуцца на іншых стратэгічных прадпрыемствах Беларусі», — адзначыў палітолаг.
Магда падкрэсліў, што ў беларускім грамадстве адсутнічае запыт на вайну з Украінай.
«Трэба разумець, што ў беларускім грамадстве няма жадання весці вайну з Украінай. І Лукашэнка рызыкуе аказацца з вельмі маленькім колам асабіста адданых людзей, якія ў выпадку эскалацыі будуць гатовыя падтрымаць ягоныя агрэсіўныя намеры», — заявіў ён.
Паводле яго, пераважная большасць беларусаў не хоча, каб вайна закранула тэрыторыю краіны.
«Я ўпэўнены, што шараговы беларус не хоча ні вайны з Украінай, ні наогул убачыць, як прылятаюць дроны або ракеты па тэрыторыі Беларусі», — сказаў Магда.
Дзеянні беларускіх уладаў, паводле ягонай ацэнкі, не могуць заставацца без наступстваў.
«Я ўпэўнены, што ўкраінскі адказ будзе, і ён будзе асіметрычным», — адзначыў палітолаг.
Ён дадаў, што, нягледзячы на напружанасць на мяжы, Украіна не зацікаўленая ў наўпроставай эскалацыі.
«Хоць цяпер беларуска-ўкраінская мяжа нагадвае лінію фронту, баявых дзеянняў там няма. Украіна не зацікаўленая ў тым, каб даваць падставу для вайны, але гэта не азначае, што ў Лукашэнкі няма ўразлівых месцаў», — заявіў Магда.
Паводле ягонага прагнозу, наступствы цяперашняй палітыкі Мінска могуць праявіцца найбліжэйшым часам.
«Я думаю, мы ўбачым іх досыць хутка — магчыма, ужо ў пачатку 2026 года», — сказаў ён.
Раней прэзідэнт Украіны Уладзімір Зяленскі абвінаваціў улады Беларусі ў спрыянні Расіі пры арганізацыі нападаў беспілотнікаў на тэрыторыю Украіны. Паводле ягонага сцвярджэння, беларуская тэрыторыя выкарыстоўваецца для абыходу ўкраінскіх сістэмаў супрацьпаветранай абароны падчас атак дронаў.
«Паводле звестак нашай выведкі, абсталяванне, што выкарыстоўваецца ва ўдарах супраць Украіны, у паселішчах Беларусі побач з мяжой размяшчаецца ў тым ліку на жылых дамах», — распавёў Зяленскі.
Прэзідэнт Украіны таксама заявіў аб магчымай рэакцыі ў адказ.
«Праінфармуем партнёраў і будзем рыхтаваць сумесныя адказы», — сказаў Зяленскі, не ўдакладніўшы, ці ідзе гаворка пра дыпламатычныя захады або вайсковы адказ.
«Беларусь цябе любіць». Рэпартаж з развітання з Мікітам Мелказёравым6
Каментары