Новы фэльетон з блогу Лёліка Ушкіна.
Новы фэльетон з блогу Лёліка Ушкіна.
Падумаў, што папулярная сёньня сярод нашых мандарынаў формула “мы вам вызваленне палітзэкаў, а вы нам ў абмен на розныя бонусы” магла сфармавацца ў савецкія часы, калі па краіне грымелі кампаніі за вызваленьне таго ці іншага вязьня антыімпэрыялізму.
Алё, алё, дайце горад, абкам. Абкам, вы мяне чуеце? На дроце старшыня саўгасу "Маладзец". Трэба тэрмінова трактары і камбайн. План гарыць. Па бураках поўны завал. Што? Чаму мне трэба канкрэтна абламацца? Таму, што "Маладзец" забіў на план партыйна - ідэйных мерапрыемстваў. Падставіў вобласць. А як жа паход калектыву малочнай фермы на чыгуначную станцыю Шклоў, праз які у 1897 г. ехаў брат Леніна Зміцер Ульянаў, а як жа конкурс дзіцячага малюнка на тэму бамбёжак Ханою амерыканскімі ВПС?
Што не правялі? Мітынг за вызваленне палітвязняў ў ЗША. Мы не правялі? ( нецэнзурная лаянка) Мы яшчэ ў маі правялі збор працоўнага калектыву ў падтрымку гэтай чорнаскурай актывісцкі… гэтай як яе імя, ну у яе яшчэ такія валасы курчавыя як барада ў Салжаніцына. Што? Пакласці партбілет на стол. За што? За мітынг ў падтрымку Салжаніцына.… Не мітынг быў не ў падтрымку Салжаніцына. Во згадаў – мітынг быў у падтрымку Анжэлы Дэвіс. Але. Але. Не чуеце. Дыктую па літарах: Англія Ноўгарад Ж…Блін, якое можа быць слова на ж…, акрамя гэтага. Вось-вось.правільна, Анжэлы Дэвіс. А Карвалан Луіс, якога абмянялі на Быкоўскага? Гэта ж была грандыёзная мерапрыемства. У нас два гады таму на зону за крадзёж цэменту з будоўлі пайшоў Пецька Быкоўскі. Дык усе думалі, што яго памянялі на Карвалана. Нават плётка па гораду пайшла: ўсіх хто крадзе цэмент амерыканцы будуць мяняць на камуністаў і даваць палітычны прытулак за акіянам..
Што вы мяне парыце? Лулумба? Хто такі Лулумба. Лідэр прагрэсіўных сіл трапічнай Афрыкі. Сядзіць у турме. Увесь свет патрабуе яго вызвалення акрамя саўгасу "Маладзец".
Давайце так – я вам вызваленне Лулумбы, а вы мяне два камбайны. І вось яшчэ даўно абяцалі – паездачку ў Еўропу. А то гэтак ніколі не Еўропу не пабачу. Ну хаця б у Балгарыю. Хоць наемся тых іхніх памідораў у банках. У нас тут такі дэфіцыт – іхнія памідоры ў банках.
Гэта ж нармальна два камбайна і паездку ў Еўропу за аднаго Лулумбу. Лулумба – гэта ж герой усіх прагрэсіўных сіл трапічнай Афрыкі. Вам жа без вызвалення Машэраў башку адрэжа. Я ж не прашу каб вы мяне крэдыт на рамонт дарогі далі. Дамовіліся. Не бойцеся арганізуем вызваленне Лулумбы па першаму разраду: Кантроль будзе жэстачайшы. Чао.
Цяпер чытаюць
Каля Сафіі ў Полацку паставілі помнік лётчыкам Нічыпарчыку і Куканенку. Але нават не самалёт той мадэлі, на якой яны загінулі, а аэраплан сталінскага часу2020
Каментары