Трэнера зборнай Беларусі па пляжным футболе прызналі найлепшым у свеце
Іспанскага настаўніка зборнай Беларусі па пляжным футболе Нікаласа Альварада прызналі найлепшым трэнерам свету 2025 года. Узнагароду яму ўручылі на ўрачыстасці «Зоркі пляжнага футбола-2025», паведамілі ў Нацыянальным алімпійскім камітэце (НАК).
За званне найлепшага трэнера Нікалас Альварада змагаўся з Эміліяна Дэль Дукам, які ўзначальвае зборную Італіі, і Аланам Кавальканці — трэнерам жаночай зборнай Партугаліі.
У 2025 годзе зборная Беларусі пад кіраўніцтвам Альварада дайшла да фіналу чэмпіянату свету, які праходзіў на Сейшэльскіх астравах. У вырашальным матчы беларусы гулялі з Бразіліяй, у якім саступілі 3:4 і заваявалі срэбра. Акрамя таго, каманда ўзяла бронзу Еўралігі.
Нікалас Альварада працуе са зборнай Беларусі з 2017 года. Да пачатку трэнерскай кар’еры ён сам гуляў у пляжны футбол: выступаў за зборную Іспаніі, а ў 2013 годзе стаў з ёй віцэ-чэмпіёнам свету.
Акурат у гэтыя дні, дарэчы, зборная Беларусі пад кіраўніцтвам Нікаласа Альварада стартавала на іспанскіх пляжах у Эль-Пуэрта-дэ-Санта-Марыя ў новым сезоне Еўралігі. У першым туры папярэдняга этапу ў групе А беларусы з вялікім лікам абыгралі туркаў — 10:2, а ў другім — зборную Чэхіі з лікам 8:3. 22 мая яны правядуць матч з партугальцамі. У наступны раўнд пройдуць дзве найлепшыя каманды.
Паралельна там жа таксама праходзяць спаборніцтвы ў квартэце В, дзе выступаюць зборныя Польшчы, Швейцарыі, Літвы і Іспаніі. А ў пачатку жніўня ў Кішынёве пройдуць адборачныя турніры ў групах C (Італія, Францыя, Малдова, Румынія) і D (Украіна, Эстонія, Германія, Данія). Пасля фінішу спаборніцтваў у сталіцы Малдовы вызначацца восем удзельнікаў суперфіналу, які адбудзецца 8—13 верасня ў італьянскім Віярэджа.
Трэнера зборнай Беларусі могуць прызнаць найлепшым у свеце
НАК вызначыў найлепшых беларускіх спартсменаў і трэнераў 2025 года
Украінскія пляжныя футбалісты адмовіліся гуляць з Беларуссю. Таму Беларусь становіцца бронзавым прызёрам Суперфіналу Еўралігі
На матчы беларускіх футбалістаў у Грузіі заўзятараў прымушалі прыбіраць БЧБ-сцягі
Каментары