Старшыня Беларускай партыі левых «Справядлівы свет» Сяргей Калякін мяркуе, што ўлады выпусцяць на волю кандыдата ў прэзідэнты на выбарах 2010 года Мікалая Статкевіча. Пра гэта ён паведаміў у інтэрв`ю БелаПАН.
«У хуткім часе Статкевіч можа апынуцца на волі, — сказаў ён. — Але гэта зусім не ў сувязі з тым, што пад яго вылучэнне кандыдатам у прэзідэнты зараз фарміруецца ініцыятыўная група».
Паводле слоў Калякіна, уладам «вельмі трэба, каб адбылася легітымацыя выбараў, а наяўнасць палітвязняў з`яўляецца вельмі вялікай перашкодай на шляху да гэтага». «Пра гэта гавораць нашым уладам усе еўрапейскія і амерыканскія палітыкі, якія прыязджаюць у Беларусь. Улады добра ведаюць, што гэта пытанне з`яўляецца для Захаду вельмі адчувальным. Думаю, яны пойдуць на яго вырашэнне», — сказаў ён.
Калякін зазначыў, што для вызвалення Статкевіча трэба, каб «гэта сказаў услых, нават не публічна, адзін чалавек у краіне». «Ёсць дзясяткі спосабаў упакаваць гэта рашэнне юрыдычна, але для гэтага павінна быць сказана слова аднаго чалавека. Прычым яно можа быць сказана раніцай, а праз дзве гадзіны Статкевіч апынецца за варотамі турмы», — падкрэсліў ён.
Калякін лічыць бессэнсоўным фарміраванне ініцыятыўнай групы па вылучэнні Статкевіча на прэзідэнцкіх выбарах гэтага года. «Партыя не лічыць, што гэта сімвалічнае дзеянне дапаможа Статкевічу. Гэта абсалютна бессэнсоўны занятак, таму што ніякіх палітычных выхадаў ён не мае. Я разумею, калі б удавалася зарэгістраваць ініцыятыўную групу і збіраць подпісы ў яго падтрымку, гэта мела б сэнс. Але гэтага не будзе. Гэта віртуальнае мерапрыемства, якое не мае палітычнага выйсця», — зазначыў ён.
Больш за тое, на погляд Калякіна, «яно можа нават пагоршыць становішча Статкевіча, які знаходзіцца ў зняволенні, але не паўплывае на яго выхад».
Цяпер чытаюць
«Вайна ўсё спіша». Беларускім удзельнікам гей-прайда ў Вільні пагражалі расправай ад імя беларускіх ваяроў за выкарыстанне бела-чырвона-белага сцяга148
Каментары