фота Радыё Свабода
Грамадскага актывіста з Гомеля, 54-гадовага палітзняволенага Юрыя Рубцова перавялі з баранавіцкага следчага ізалятара ў папраўчую калонію № 2 Бабруйска. На мінулым тыдні Аляксандр Лукашэнка абяцаў журналістам азнаёміцца з яго справай.
Пра перавод Рубцова праваабаронцам стала вядома 11 жніўня. «Верагодна, перавялі ў выхадныя, бо яшчэ ў пятніцу Рубцоў знаходзіўся ў СІЗА г. Баранавічы», — паведамляе праваабарончы сайт spring96.org.
Праблемы з уладамі пачаліся ў Рубцова пасля таго, як ён стаў рэгулярна прыходзіць на вулічныя акцыі апазіцыі ў майцы з надпісам «Лукашэнка, сыходзь». За гэта гомельскаму актывісту нават далі мянушку «чалавек-майка».
У кастрычніку 2014 года Рубцоў быў асуджаны на падставе артыкула 391 КК (абраза суддзі ці народнага засядацеля). Суд Цэнтральнага раёна Мінска прыгаварыў яго да паўтара года абмежавання волі з накіраваннем ва ўстанову адкрытага тыпу.
Новая крымінальная справа ў дачыненні да гомельскага актывіста была заведзена ў сакавіку гэтага года на падставе артыкула 415 КК (ухіленне ад адбывання пакарання ў выглядзе абмежавання волі) пасля таго, як палітзняволены адмовіўся ад працы з зарплатай ніжэйшай за 600 долараў (паводле афіцыйнай статыстыкі, гэта сярэдняя зарплата па краіне).
У маі суд Пружанскага раёна Брэсцкай вобласці прызнаў Рубцова вінаватым і прыгаварыў яго да двух гадоў пазбаўлення волі ў калоніі агульнага рэжыму з улікам неадбытага тэрміну. У ліпені Брэсцкі абласны суд разгледзеў касацыйную скаргу Рубцова і пакінуў прыгавор без змяненняў.
«Міжнародная амністыя» прызнала Рубцова вязнем сумлення.
4 жніўня падчас інтэрв'ю Аляксандр Лукашэнка, пачуўшы пра гісторыю Рубцова, паабяцаў азнаёміцца з яго справай.
Героя тэлефонных зліваў палкоўніка Кісяля, які заклікаў калечыць дэманстрантаў, раптоўна апусцілі на раённы ўзровень12
Каментары