«Лепш выкінуць, чым аддаць?» Фермер паказаў, як выкідае клубніцы, і выклікаў абурэнне
Фермер з Брэсцкай вобласці апублікаваў у тыктоку відэа, на якім з мікрааўтобуса на сметнік выкідае некалькі скрынак клубніц. Ролік хутка набраў прагляды, аднак аўтар у роліку не ўдакладніў важную дэталь: гаворка ішла не пра свежы ўраджай, а пра рэшткі непрададзеных ягад, якія ўжо пачалі псавацца і страцілі таварны выгляд, піша выданне Pinsk.life.
Тым не менш, у каментарах разгарэлася сапраўдная спрэчка. Многія карыстальнікі вырашылі, што фермеры аддаюць перавагу таму, каб выкінуць прадукцыю, замест таго каб знізіць цану ці бясплатна раздаць тым, хто мае патрэбу.
«Сам не гам і нікому не дам. Лепш выкінуць, чым зрабіць добрую зніжку і прадаць», — напісала адна з карыстальніц.
Іншыя прапаноўвалі прадаваць клубніцы з уцэнкай:
«50% зніжку зрабіць — разбяруць».
«Прадавалі б танней, не прыйшлося б выкідаць».
Некаторыя каментатары палічылі, што фермеры проста не хочуць займацца дабрачыннасцю:
«Нашы камерсанты дабрачыннасцю не займаюцца, лепш выкінуць».
Гучалі і прапановы бясплатна перадаваць ягады людзям або сацыяльным установам.
«Пра дзіцячыя дамы не чуў?»
Аднак частка карыстальнікаў стала на бок фермера. Яны нагадалі, што гаворка ідзе пра прадукт, які хутка псуецца і пасля некалькіх дзён захоўвання можа стаць непрыдатным для продажу і спажывання.
Пры гэтым іншыя карыстальнікі заўважылі, што перадача прадуктаў у сацыяльныя ўстановы не заўсёды такая простая, як здаецца. Для гэтага існуюць пэўныя патрабаванні і працэдуры, асабліва калі гаворка ідзе пра прадукцыю, якая хутка псуецца.
Адзін з каментатараў адзначыў:
«Адзін раз бясплатна раздаў — у наступным сезоне зноў будуць чакаць халяву».
Сам аўтар роліка пазней умяшаўся ў абмеркаванне і патлумачыў сітуацыю:
«Дык людзі не разумеюць. Гэта рэшткі, якія не паспеў прадаць. Яны сапсаваліся».
На прапанову перадаць ягады ў дзіцячыя дамы фермер адказаў з доляй іроніі:
«Чуў! Заўтра ў мяне выбарка, можаш прыехаць!»
Спрэчка пра цэны на клубніцы
Паралельна ў каментарах разгарнулася яшчэ адна дыскусія — пра кошт ягад у розных рэгіёнах краіны.
Адна з карыстальніц напісала:
«Не кожнаму па кішэні купляць іх па 10—12, а то і 15 рублёў за кілаграм».
У адказ ёй заўважылі, што такія цэны часцей сустракаюцца ў перакупшчыкаў і раздробных прадаўцоў, тады як закупачны кошт у вытворцаў значна ніжэйшы. Паводле інфармацыі ад фермера з Брэсцкай вобласці, фермерскія клубніцы перакупы бяруць па 8 рублёў. А ў насельніцтва, вырашчаныя для сябе, перакупшчыкі часам скупляюць нават па 2,5 рубля. У Дварцы ў Лунінецкім раёне клубніцы 7 чэрвеня скуплялі па 5 рублёў.
Карыстальнікі таксама падзяліліся цэнамі, якія бачылі ў сваіх гарадах. Так, адзін мінчук расказаў, што 11 чэрвеня купіў клубніцы па 15 рублёў за кілаграм. У Маладзечне, паводле слоў мясцовых жыхароў, ягады прадавалі па 8 рублёў за кілаграм, у Дзяржынску — па 15 рублёў, а ў Карме кошт даходзіў да 19 рублёў за кілаграм.
Чаму фермеры часам выкідаюць ураджай
Сітуацыі, калі частка ўраджаю адпраўляецца на сметнік, адбываюцца не толькі ў Беларусі. Асабліва часта гэта тычыцца ягад, садавіны і гародніны з кароткім тэрмінам захоўвання.
Нават калі прадукт яшчэ выглядае ядомым, ён можа хутка страціць таварны выгляд: памяцца, пусціць сок або пачаць псавацца. Для прадаўца гэта азначае рызыку прэтэнзій з боку купцоў. Акрамя таго, на сартаванне, перавозку і раздачу прадукцыі таксама патрабуюцца час і дадатковыя выдаткі.
Гісторыя з выкінутымі клубніцамі паказала, наколькі па-рознаму людзі глядзяць на праблему. Адныя ўпэўненыя, што любую прадукцыю лепш аддаваць бясплатна або прадаваць са зніжкай. Іншыя лічаць, што карыстальнікі сацсетак не заўсёды разумеюць, з якімі цяжкасцямі сутыкаюцца вытворцы тавараў, што хутка псуюцца, і што не ўсе ягады, якія трапілі ў смеццевы кантэйнер, прыдатныя для спажывання.
Каментары