Следчы камітэт Беларусі дазволіў экс-кандыдату ў прэзідэнты Алесю Міхалевічу з 30 кастрычніка па 5 лістапада выехаць у Чэхію.
фота Сяргея Гудзіліна
Як паведаміў Міхалевіч, у Чэхіі ён мае намер адмовіцца ад палітычнага прытулку, пасля чаго вернецца ў Беларусь, дзе ў дачыненні да яго ўсё яшчэ вядзецца крымінальная справа аб масавых беспарадках 19 снежня 2010 года.
Міхалевіч вярнуўся ў Беларусь 8 верасня праз чатыры з паловай гады эміграцыі ў Чэхіі, дзе атрымаў палітычнае прыстанішча. Ён быў затрыманы беларускімі памежнікамі пры ўездзе з Літвы падчас пашпартнага кантролю як асоба, якая зараз знаходзіцца ў нацыянальным вышуку. Міхалевіча перадалі міліцыі, але праз некалькі гадзін адпусцілі на волю пад падпіску аб нявыездзе.
Вярнуўшыся на радзіму, Міхалевіч адразу ж падаў ва Упраўленне Следчага камітэта па горадзе Мінску хадайніцтва аб спыненні ў дачыненні да яго крымінальнай справы, якая ў дачыненні да іншых фігурантаў ужо закрытая. Аднак у задавальненні хадайніцтва яму адмоўлена.
Такім чынам, Алесь Міхалевіч працягвае заставацца ў статусе абвінавачванага па крымінальнай справе аб масавых беспарадках у Мінску 19 снежня 2010 года.
Варта зазначыць, што ў Канвенцыі ААН аб статусе бежанца ўтрымліваюцца шэраг умоў, пры якіх чалавек пазбаўляецца статусу бежанца. Адна з іх — добраахвотнае вяртанне ў краіну, якую чалавек пакінуў з-за апасенняў пераследу. Такая ж норма ўтрымліваецца і ў законе Чэхіі аб бежанцах.
![Клас Клас](https://nashaniva.com/images/reactions/reaction-like.png)
![Панылы сорам Панылы сорам](https://nashaniva.com/images/reactions/reaction-facepalm.png)
![Ха-ха Ха-ха](https://nashaniva.com/images/reactions/reaction-smile.png)
![Ого Ого](https://nashaniva.com/images/reactions/reaction-omg.png)
![Сумна Сумна](https://nashaniva.com/images/reactions/reaction-sad.png)
![Абуральна Абуральна](https://nashaniva.com/images/reactions/reaction-anger.png)