Скандал у Кыргызстане з-за заручын пляменніцы прэзідэнта Жапарава. Таму прыйшлося выбачацца
Прэзідэнт Кыргызстана Садыр Жапараў папрасіў прабачэння за пляменніцу, якая апублікавала відэа з прапановай ад свайго хлопца, у якім выкарыстоўваўся верталёт МНС. Відэа выклікала вялікі рэзананс у краіне.
Жапараў заявіў, што будучы зяць павінен быў пастарацца «не падстаўляць прэзідэнта», падумаць, перш чым прасіць рукі яго пляменніцы такім спосабам. Пры гэтым кіраўнік дзяржавы адзначыў, што ўлады здаюць верталёты ў арэнду, каб атрыманыя грошы накіроўваць у бюджэт, і дзяржава дае іх усім жадаючым.
«Блізкія кіраўніцтва краіны павінны быць прыкладам для іншых. Я часта паўтараю, што трэба спыніць марнатраўства. Як мінімум, будучы зяць мог падтрымаць мяне і падумаць, перш чым рабіць такую прапанову. Ён павінен быў паспрабаваць не нарывацца на крытыку, не падстаўляць прэзідэнта. Думаю, ён зрабіў гэта па маладосці. Спадзяюся, што надалей яны будуць думаць, а затым рабіць», — сказаў Жапараў.
Ён таксама адзначыў, што ўвесь час папярэджвае братоў і іх дзяцей, каб яны не ўмешваліся ў дзяржаўныя справы. «Раней я крытыкаваў іншых. Цяпер сутыкнуўся з гэтым сам», — дадаў ён.
Увечары 24 чэрвеня пляменніцы прэзідэнта Садыра Жапарава — 23-гадовай Лазат Нуркажоевай — зрабілі прапанову рукі і сэрца. Відэа і фота з момантамі ўрачыстасці былі апублікаваны на яе старонцы ў Instagram.
Мяркуючы па кадрах, прапанова была зроблена ў вёсцы Кашка-Суу, куды Лазат Нуркажоева разам са сваім будучым жаніхом прыляцела на верталёце. Верталёт Airbus H-125 з бартавым нумарам EX-88010 належыць МНС Кыргызстана.
Пасля гэтага пара паднялася на падрыхтаваную платформу, побач знаходзіліся родныя і блізкія. На прапанову Лазат Нуркажоева адказала згодай. Пра жаніха пакуль нічога не вядома.
Лазат Нуркажоева зʼяўляецца самай публічнай персонай сярод сваякоў прэзідэнта. Яна стварыла ўласны дызайнерскі брэнд адзення два гады таму, не раз трапляла ў публікацыі СМІ з тых ці іншых нагод. Напрыклад, як адзначала свой дзень нараджэння, заступалася за свайго дзядзьку з-за дарагога адзення, называла яго «бацькам народа». Яна таксама паркавалася на тратуары, парушаючы ПДР, ёй выдавалі спецпропуск на прэзідэнцкае мерапрыемства, піша kaktus.media.
Шырокую вядомасць яна здабыла пасля таго, як стала пераможцай конкурсу прыгажосці «Міс Кыргызстан — 2020», праз два з паловай месяцы пасля таго, як яе дзядзька Садыр Жапараў прыйшоў да ўлады ў краіне.
Пазней высветліцца, што дадзены конкурс не зʼяўляецца афіцыйным і што ён не мае дачынення да міжнародных конкурсаў прыгажосці. Пры гэтым на сваёй старонцы ў сацсетках Лазат Нуркажоева ў канцы студзеня 2021 года заяўляла, што прадставіць краіну на міжнародным конкурсе прыгажосці «Міс Сусвет». Аднак у спісе ўдзельніц конкурсу прыгажосці «Міс Сусвет — 2021» яе ў выніку не аказалася.
Па Кыргызстане распаўзаецца страх. Што адбываецца ў гэтай краіне і чаму там масава саджаюць журналістаў
Прэзідэнт Кыргызстана прыгожа патлумачыў, чаму яму варта балатавацца на другі тэрмін
У Кыргызстане вырашылі трохі змяніць выгляд сцяга, каб «не быць больш залежнымі»
Прэзідэнт Кыргызстана напісаў пышную падзяку Лукашэнку за «строгае даручэнне», «асабісты кантроль» і «якасны» рамонт верталёта
Цяпер чытаюць
Кадэбэшнікі тэлефануюць беларусам у эміграцыі праз іх сяброў — чаго хочуць?13
Каментары