AP
У сераду, 18 лістапада, французская паліцыя пры падтрымцы спецназа і вайскоўцаў праводзіць спецаперацыю ў парыжскім прыгарадзе Сен-Дэні, дзе ў адной з кватэр у цэнтры горада схаваліся падазраваныя ў датычнасці да тэрактаў 13 лістапада.
У кватэры, як мяркуецца, хаваецца падазраваны ў арганізацыі тэрактаў, Абдэльхамід Абауд. Пры спробе штурму двое падазраваных былі забітыя. Адзін быў застрэлены снайперам, жанчына-смяротніца прывяла ў дзеянне пояс з выбухоўкай, паведамляе пракуратура Парыжа.
Спецаперацыя праводзіцца ў доме на плошчы Жан-Жарэс, размешчанай за 800 метраў ад стадыёна «Стад дэ Франс», дзе 13 лістапада падарвалі сябе трое смяротнікаў.
Па словах міністра юстыцыі, паліцэйская аперацыя ў Сэн-Дэні блізкая да завяршэння. Аперацыя пачалася на золку, каля паловы на пятую раніцы. У цэнтры Сен-Дэні адбылося некалькі перастрэлак, двое паліцэйскіх атрымалі раненні, паведамляе газета «Монд».
Па дадзеных агенцтва Франс-Прэс, якое спасылаецца на паліцэйскія крыніцы, мэтай аперацыі быў галоўны падазраваны ў арганізацыі тэрактаў 13 лістапада ў Парыжы Абдэльхамід Абауд. Раней меркавалася, што Абауд знаходзіцца ў Сірыі.
АФП паведамляе аб затрыманні ў цэнтры горада гаспадара кватэры, які сказаў, што ў ёй пражывалі людзі, якія прыехалі з Бельгіі. У кватэры па-ранейшаму знаходзіцца адзін чалавек.
