Лідара РГА «Перспектыва» Анатоля Шумчанку аштрафавалі за ўдзел у акцыі на Дзень Волі
Старшыню РГА «Перспектыва» Анатоля Шумчанку «аштрафавалі на 30 базавых велічынь (6,3 млн. рублёў) за ўдзел у несанкцыянаваным уладамі мітынгу ў Дзень Волі 25 сакавіка. Пра гэта яму паведамілі, даслаўшы адпаведную пастанову суда Савецкага раёна Мінска.
Пры гэтым, як паведаміў Шумчанка на сваёй старонцы ў «Фэйсбуку», шанцаў ўдзельнічаць у судзе ўлады яму не пакінулі, даслалі позву на дзень пазней самога судовага пасяджэння (судовая позва з запрашэннем у суд на 24 мая прыйшла яму па пошце 25 мая).
«Гэта значыць належным чынам мне паведамлена не было, як трэба, пад подпіс, — зазначыў Шумчанка. — Дарэчы, сам суд лічыць, што ўсё належным чынам аформлена».
«Затое рашэнне па штрафу прынеслі як належыць, паштовым кур`ерам пад подпіс», — паведаміў лідар прадпрымальніцкага аб`яднання.
Рашэнне аб штрафе вынесла суддзя Савецкага раёна Вольга Дубаневіч.
Гэтую пастанову Шумчанка мае намер абскардзіць, каб, паводле яго слоў, «яшчэ раз паказаць» беларускае правасуддзе «ва ўсіх фарбах».
Нагадаем, Мінгарвыканкам дазволіў правядзенне ў сталіцы 25 сакавіка акцыі з нагоды Дня Волі ў наступным фармаце: збор удзельнікаў каля кінатэатра «Кастрычнік», шэсце па вуліцы Сурганава да плошчы Бангалор, мітынг у парку Дружбы народаў. Аднак некаторыя палітыкі і актывісты перад пачаткам дазволенага шэсця прынялі ўдзел ва ўскладанні кветак да помніка Янку Купалу ў аднайменным скверы, правялі там мітынг і прайшлі калонай па праспекце Незалежнасці да кінатэатра «Кастрычнік», што не было дазволена Мінгарвыканкамам.
Каментары