Буйны і прэстыжны Зальцбургскі фестываль адкрые прамовай Марыя Калеснікава
Аркестрам на адкрыцці будзе кіраваць беларускі дырыжор Віталь Алексяёнак, піша DW.
У аўстрыйскім Зальцбургу ў нядзелю, 26 ліпеня, пройдзе афіцыйная цырымонія адкрыцця Зальцбургскага фестывалю — аднаго з найбуйнейшых сусветных форумаў класічнай музыкі і тэатра.
Традыцыйная ўрачыстая прамова штогод адкрывае фестываль і задае тон яго грамадскай дыскусіі. Сёлета арганізатары запрасілі выступіць на адкрыцці Марыю Калеснікаву — адну з лідарак пратэстаў у Беларусі 2020 года. Прафесійная флейтыстка і дырыжорка, Калеснікава з’яўляецца ганаровай прафесаркай універсітэта Мацартэум у Зальцбургу і ўладальніцай Міжнароднай прэміі Карла Вялікага.
«Марыя Калеснікава — доказ таго, што менавіта мастацтва дае людзям мужнасць і апору ў жыцці. Мова музыкі і паэзіі заўсёды мацнейшая за гвалт, тыранію і самаўпраўства», — цытуе сайт фестывалю словы інтэнданткі Карын Бергман.
Музычную праграму цырымоніі адкрыцця ўзначаліць беларускі дырыжор Віталь Алексяёнак. Ён будзе дырыжаваць аркестрам Мацартэума Зальцбурга. Пасля прэзідэнцкіх выбараў 2020 года ў Беларусі дырыжор адкрыта выступіў супраць рэжыму Аляксандра Лукашэнкі і пазней апісаў падзеі таго часу ў кнізе «Белыя дні Мінска. Наша мара пра свабодную Беларусь». Цяпер Алексяёнак — галоўны дырыжор Нямецкай оперы на Рэйне ў Дзюсельдорфе і Дуйсбургу.
Каментары