Самая небяспечная — 1 капейка: у дзень да медыкаў прывозяць да 30 дзяцей, што глытаюць манеты
Штодня ў Рэспубліканскі навукова-практычны цэнтр дзіцячай хірургіі прывозяць трох-пяцярых дзяцей, што праглынулі манеты. У цэлым па краіне колькасць такіх выпадкаў можа даходзіць да 30 у дзень.
Пра гэта распавёў Аляксандр Свірскі, загадчык аддзела дзіцячай хірургіі РНПЦ.
— Сёння, напрыклад, дзіця, якое лечыцца ў інстытуце траўматалогіі і артапедыі, едзе да нас, каб выдаліць са страўніка манету. Учора ўвечары праглынуў, — распавядае Аляксандр Свірскі.
Канстанцін Драздоўскі, дырэктар Рэспубліканскага навукова-практычнага цэнтра дзіцячай хірургіі, дадаў, што хірургічных умяшанняў ў сувязі з даставаннем манет менш, чым зваротаў. Не кожную манету трэба аператыўна даставаць, яна можа выйсці з арганізма натуральным шляхам.
Па словах Аляксандра Свірскага, найбольш небяспечныя для дзяцей дробныя манеты, асабліва — адна капейка. Дзіця яе можа не толькі праглынуць, але і ўдыхнуць.
— Калі манета патрапіла ў дыхальныя шляхі, вы не зможаце аказаць дапамогу, і дзіця можа загінуць. Выманне з дыхальных шляхоў працякае вельмі траўматычна. Такіх пацыентаў з іншароднымі целамі ў дыхальных шляхах досыць шмат было ў мінулым годзе ў Віцебскай вобласці. Некалькі дзяцей загінулі, — адзначае ён.
Калі манета патрапіла ў страўнікава-кішачны тракт, то ступень траўматызацыі залежыць ад памеру манеты, часу, які яна там знаходзіцца, і таго, як доўга медыкі не мелі магчымасці назіраць пацыента.
Калі ўвогуле казаць пра іншародныя целы, якія можа праглынуць дзіця, то большую небяспеку, чым манеты, прадстаўляюць батарэйкі.
Яны прапальваюць не толькі сценкі стрававода, але і суседніх органаў, напрыклад, трахеі. З пяці дзяцей, якія праглынулі батарэйкі і якіх спрабавалі выратаваць у РНПЦ дзіцячай хірургіі, трое загінулі.
Часцей за ўсё праглынуць іншародныя целы спрабуюць дзеці ва ўзросце да пяці гадоў.
Аляксандр Свірскі нагадвае: дзіця пазнае свет праз смакавыя рэцэптары, таму і спрабуе паспрабаваць прадметы на смак.
Пры гэтым ён у першую чаргу звяртае ўвагу на рэчы, якія знаходзяцца на ўзроўні вачэй. Дарослыя павінны гэта ўлічваць і прыбраць усе небяспечныя прадметы ў межах дасяжнасці дзяцей.
— Калі дзіця маўчыць і прыціхла, значыць, ідзіце і глядзіце, што яно робіць, - рэкамендуе спецыяліст.
Цяпер чытаюць
«Чаму я павінен даказваць, што не дармаед?» Прадпрымальніка з Гомеля памылкова запісалі ў незанятыя — ён даведаўся толькі пасля вялізных рахункаў за камуналку2
Каментары