Навуковец патлумачыў, чаму ў Мінску больш пахмурных дзён, чым на «туманным Альбіёне»
Навуковы супрацоўнік лабараторыі кліматычных даследаванняў Інстытута прыродакарыстання НАН Беларусі Іван Буякоў адзначае, што ўяўленне пра Лондан як пра пастаянна шэры, туманны і дажджлівы горад ужо шмат у чым састарэлае, піша sb.by.
Паводле кліматычных даных, у Мінску за год бывае прыкладна 23—35 цалкам ясных дзён, калі на небе няма ніводнага воблака. У Лондане такіх дзён значна больш — ад 45 да 60. Пахмурных дзён у беларускай сталіцы налічваецца каля 167—177 за год, а ў брытанскай — прыкладна 140—160.
Адной з прычын навуковец называе рэльеф. Лондан размешчаны ў адносна нізкай мясцовасці — прыкладна на вышыні 20—30 метраў над узроўнем мора. Мінск знаходзіцца значна вышэй: ад каля 180 метраў у раёне Шабаноў да амаль 270 метраў каля станцыі метро «Спартыўная». Вільготнае паветра, трапляючы на ўзвышшы, падымаецца, ахалоджваецца і ў выніку спрыяе ўтварэнню нізкіх аблокаў і туманаў.
Яшчэ адзін чыннік — геаграфічнае становішча Беларусі. Праз тэрыторыю краіны рэгулярна праходзяць атлантычныя цыклоны, якія прыносяць вялікія масы вільготнага паветра. Гэта спрыяе фармаванню шчыльнай воблачнасці.
Трэцяя прычына — тэмпературныя інверсіі, асабліва характэрныя для перыяду з кастрычніка да сакавіка. Падчас антыцыклонаў тэмпература часам павышаецца з вышынёй: над халодным прыземным паветрам утвараецца больш цёплы слой, які працуе як своеасаблівая «вечка». Ён перашкаджае вільгаці і халоднаму паветру падымацца вышэй. У выніку вільгаць назапашваецца каля зямлі, ахалоджваецца і ўтварае суцэльную шэрую воблачнасць.
У Лондане сітуацыю часткова змякчае блізкасць да мора. Марскія брызы могуць рассейваць воблачнасць, таму, нягледзячы на рэпутацыю «туманнага Альбіёна», брытанская сталіца ў сярэднім мае больш ясных дзён і менш пахмурных, чым Мінск.
Цяпер чытаюць
Чым цяпер займаюцца дзяўчаты, якіх летась назвалі самымі прыгожымі ў Беларусі?9
Чым цяпер займаюцца дзяўчаты, якіх летась назвалі самымі прыгожымі ў Беларусі?
Містычнае кола Вільні: Каліноўскі быў пахаваны з медальёнам святыні, каля якой вырас гатычны палац доктара з-пад Оршы. Цяпер парэшткі Каліноўскага перапахавалі ў магільні таго ж доктара2121
Каментары