У лідара баранавіцкіх прадпрымальнікаў праводзяць вобшук па справе аб паклёпе: ён скардзіўся, што ў райвыканкаме п'юць
У Баранавічах адбываецца вобшук у доме сям'і Чарнавусаў.
Бацька і сын Чарнавусы — мясцовыя актывісты. Старэйшы Мікалай — лідар баранавіцкіх прадпрымальнікаў, адзін з ініцыятараў сходу «абураных беларусаў» у горадзе.
Міліцыя прыехала да іх сёння, што шукаюць — невядома.
«Мяне забралі з работы і толькі каля веснікаў хаты паказалі пастанову на вобшук. Справа ў «паклёпе».
Некалі я зайшоў у райвыканкам, а там пустыя кабінеты — няма нікога. Толькі за аднымі дзвярыма гоман стаіць. Я зайшоў — яны там п'юць, у працоўны час! Пазваніў у міліцыю, яны ўсіх гэтых чыноўнікаў забралі на агляд на наяўнасць алкаголю. Але там вынікі аказаліся — 0 праміле.
Я яшчэ і Лукашэнку ліст напісаў з гэтай нагоды, а чыноўнікі на мяне за гэта заяву напісалі за паклёп (максімальнае пакаранне — да трох гадоў абмежавання волі). Вось цяпер у рамках гэтай крымінальнай справы і праводзіцца вобшук. Ужо гадзіну глядзяць, нічога не знайшлі, што трэба знайсці — яны і самі не ведаюць, здаецца», — патлумачыў сітуацыю Мікола Чарнавус-старэйшы.
Ён жыве з сынам у адным доме, але на розных паверхах.
Сына пакуль што няма, адамкнуць другі паверх не атрымліваецца, таму міліцыя прывезла чалавека з ЖЭСа, каб ламаць дзверы.
«Магчыма, падкінуць нам штосьці хочуць, ці проста знайсці штосьці такое, што ў іх вачах будзе выглядаць, як кампрамат. Пакуль не ведаю, паглядзім, — сказаў «Нашай Ніве» Мікола Чарнавус-малодшы. — Магчыма, бацьку хочуць ізаляваць перад акцыямі, запланаванымі на май».
Каментары