У Віцебску педафіл выкінуў 14‑гадовую дзяўчыну з балкона. Злачынцу дапамаглі выкрыць навукоўцы
У студзені 2020 года ў Віцебску загінула 14‑гадовая дзяўчына — яна выпала з балкона трэцяга паверха. Трагедыя адбылася на вуліцы Карла Маркса ў кватэры 37‑гадовага мужчыны. Спачатку здарэнне расцанілі як самагубства, распавядаюць «Віцьбічы».
37‑гадовы гаспадар кватэры сцвярджаў, што дзяўчына прыйшла да яго ў госці, а ён тым часам выйшаў у краму. Вярнуўшыся, убачыў яе ўжо пад акном. Аднак следчага насцярожылі абставіны здарэння.
«Хоць спецыялісты, якія прыбылі на месца, першай версіяй вылучылі суіцыд, мяне яна не задаволіла», — кажа следчы па асабліва важных справах Алег Асіпоўскі.
Амаль двухметровы 37‑гадовы мужчына лёгка прыцягваў увагу дзяўчат. Таварыскі, не пазбаўлены шарму і фантазіі. А яшчэ паспеў папрацаваць у якасці ахоўніка на папулярным гумарыстычным шоу ў сталіцы Расіі. Некалькі фатаграфій з зоркамі толькі дадавалі яму аўтарытэту. Праўда, цягнула яго на ўсё больш маладых дзяўчат, піша выданне.
Мужчыну правяралі на датычнасць да педафіліі. Але той спрытна ўхіляўся ад усіх абвінавачанняў. Нічога дрэннага не казала пра яго і дзяўчынка. А потым і зусім здарылася трагедыя.
Падлетак упала з балкона трэцяга паверха. Пры гэтым яна атрымала траўмы, несумяшчальныя з жыццём.
Следчы вымераў вышыню парэнчаў на балконе — яна складала каля 125 сантыметраў. Рост дзяўчыны быў менш за 165 сантыметраў, а важыла яна ўсяго 48 кілаграмаў. Пры гэтым на балконе не знайшлі слядоў, якія маглі б пацвердзіць, што яна сама пералазіла праз парэнчы.
Тым часам мужчына працягваў пераконваць усіх у сваёй невінаватасці. Увесь час расказваў усім пра бяду, што здарылася. Пры гэтым кожнаму выдаваў версію, якая трохі адрознівалася ад папярэдняй. На гадавіну гібелі дзяўчыны ён зладзіў сапраўдны вечар-рэквіем, на які запрасіў знаёмых. На ім шмат плакаў. Не прызнаваў сваю віну і ў педафіліі. Расказваў, што дзяўчына схлусіла яму пра свой узрост.
Тады да расследавання прыцягнулі навукоўцаў з Інстытута цепла– і масаабмену імя А. В. Лыкава Нацыянальнай акадэміі навук Беларусі. На падставе замераў яны разлічылі траекторыю падзення і іншыя параметры. Іх выснова была адназначнай — цела выкінулі.
Пасля гэтага расследаванне рэзка паскорылася. Мужчыну затрымалі. Нягледзячы на доказы, ён да канца адмаўляў сваю віну. Следства таксама пацвердзіла факты педафіліі. Падчас расследавання стала вядома яшчэ пра дзвюх непаўналетніх пацярпелых — 14‑гадовую і 15‑гадовую дзяўчат.
Суд прызначыў яму 11 гадоў пазбаўлення волі.
Цяпер чытаюць
«Больш за 10 чалавек выехалі ў Еўропу — і гэта толькі з майго аддзялення». Рэаніматолаг з райцэнтра шчыра апісаў будні беларускай медыцыны26
Каментары