Пракуратура афіцыйна папярэдзіла старшыню баранавіцкай суполкі Саюза палякаў у Беларусі пра крымінальную адказнасць за дзейнасць ад імя незарэгістраванай арганізацыі.
18 лютага пракурор Баранавічаў Ігар Палыка вынес афіцыйнае папярэджанне старшыні баранавіцкай суполкі Саюза палякаў у Беларусі і дырэктару Дома Польскага Тэрэсе Селівончык. Пракуратура закідае ёй актыўны ўдзел у дзейнасці незарэгістраванага грамадскага аб’яднання «Саюз палякаў на Беларусі» на чале з Анжалікай Борыс. Яе
вінавацяць у арганізацыі дастаўкі ў Дом Польскі друкаванай прадукцыі, у якой «падкрэсліваецца кіроўная роля Борыс А. у жыцці паланійных структур, што функцыянуюць у Рэспубліцы Беларусь», а таксама «утрымліваецца тэндэнцыйная інфармацыя аб сацыяльна-палітычнай сітуацыі ў Рэспубліцы Беларусь». Акрамя таго, актыўны ўдзел Тэрэсы Селівончык у жыцці незарэгістраванай арганізацыі выяўляецца ў
«рэгулярным удзеле ў сходах прыхільнікаў Борыс А.», а таксама «аказання садзейнічання» ў падрыхтоўцы і правядзенні 14-15 сакавіка з’езду арганізацыі на базе Дома Польскага.
У выпадку рэцыдыву пракуратура будзе ставіць пытанне пра прыцягненне старшыні баранавіцкай суполкі СПБ да крымінальнай адказнасці, гаворыцца ў папярэджанні.
Як паведаміў прэс-сакратар СПБ Ігар Банцар, гэтае папярэджанне кіраўніцтвам арганізацыі адназначна расцэньваецца, як запалохванне. «У чацвёртым пункце гэтага дакумента гаворыцца пра аказанне садзейнічання ў падрыхтоўцы і правядзенні з’езду, а затым робіцца папярэджанне пра крымінальную адказнасць у выпадку, калі дырэктар Дома Польскага не спыніць сваёй дзейнасці. А артыкул 193-1 КК — гэта да двух гадоў зняволення» — адзначыў сп. Банцар. Па яго словах,
на сустрэчы з пракурорам, акрамя Т. Селівончык і яе адваката, прысутнічаў невядомы чалавек, які здымаў прысутных на камеру.«Мы расцэньваем гэта, як правакацыю і будзем абскарджваць такія дзеянні» – падкрэсліў прэс-сакратар. Ігар Банцар зазначыў, што з’езд адбудзецца ў любых умовах, нават у лесе, ці ў адкрытым полі, калі спатрэбіцца. «Нас можа спыніць толькі крайні варыянт – сілавы, калі, канечне, улады пойдуць на гэта» – заявіў ён.
Нагадаем, што 14-15 сакавіка мае адбыцца з’езд непрызнанага ўладамі Саюзу палякаў на чале з Анжалікай Борыс.
У апошні час у дачыненні да сяброў СПБ пачасціліся правакацыі. Так, у пачатку лютага на кватэры гродзенскага журналіста Андрэя Пачобута невядомыя зламыснікі пашкодзілі ўваходныя дзверы ды пакінулі побач цыдулку з пагрозамі. Таксама невядомыя неаднойчы тэлефанавалі ягонай дачцэ. Тым часам, на сваім блогу журналіст паведамляе пра цэлую хвалю ціску на актывістаў Саюза палякаў з мэтай прымусіць іх адмовіцца ад удзелу ў дзейнасці арганізацыі.
За дзейнасць ад імя незарэгістраванай арганізацыі ў свой час праз суды прайшлі сябры незарэгістраваных арганізацый «Партнёрства» і «Малады фронт». Цімох Дранчук, Эніра Браніцкая, Мікола Астрэйка, Аляксандр Шалайка, Зміцер Дашкевіч адбывалі пакаранне ў турмах.
Расійскія прапагандысты выдумалі ўдар дрона па турыстычным аўтобусе. Але ў гісторыі ёсць загадкавыя фуры5
Каментары