У Мінску на беларускай мове вучыцца 1,6% школьнікаў — жахлівая статыстыка русіфікацыі
На пачатак 2025/2026 навучальнага года ў сталіцы толькі 3569 з 223 756 вучняў навучаліся на беларускай мове. Гэта 1,6% ад агульнай колькасці школьнікаў — самы нізкі паказчык сярод усіх рэгіёнаў краіны. У сярэднім у Беларусі беларускамоўнае навучанне ахоплівала 8% школьнікаў, толькі ў Мінскай вобласці — 16,4%, што больш чым у дзесяць разоў перавышае сталічны ўзровень.
Паводле статыстыкі Міністэрства адукацыі, усяго ва ўстановах агульнай сярэдняй адукацыі Беларусі на пачатак 2025/2026 навучальнага года навучаліся 1 058 693 вучні. З іх толькі 84 546 атрымлівалі адукацыю на беларускай мове, што складае 8% ад агульнай колькасці. Астатнія 974 147 чалавек (92%) вучыліся на рускай мове.
Іншымі словамі, толькі кожны дванаццаты школьнік у Беларусі навучаўся на беларускай мове.
Пры гэтым паказчык амаль не змяняецца па класах: у 1-3‑х класах ён аднолькавы — 7,8%, а ў цэлым вагаецца ад 7% у 10‑х класах да 8,8% у 9-х. Гэта сведчыць, што беларускамоўнае навучанне застаецца прыкладна аднолькава рэдкай з’явай на ўсіх этапах школьнай адукацыі.
Дзе больш беларускамоўных вучняў
Больш за палову ўсіх вучняў, якія атрымліваюць адукацыю на беларускай мове, прыпадае на дзве вобласці — Мінскую і Брэсцкую.
У Мінскай вобласці па-беларуску навучаюцца 27 177 школьнікаў — амаль кожны шосты (16,4%), у Брэсцкай — 21 436, або прыкладна кожны восьмы (12,7%).
За імі ідуць Гродзенская вобласць, дзе па-беларуску навучаўся прыкладна кожны дванаццаты школьнік (8,1%), Гомельская — кожны пятнаццаты (6,7%), Магілёўская — кожны шаснаццаты (6,2%) і Віцебская — толькі кожны дваццаць трэці (4,4%).
Сталіца — на апошнім месцы
На гэтым фоне Мінск выглядае катастрафічна. У сталіцы беларускамоўнае навучанне стала рэдкасцю.
З 223 756 школьнікаў толькі 3569 вучыліся на беларускай мове. Гэта 1,6% усіх вучняў сталіцы.
Іншымі словамі, па-беларуску навучаўся прыкладна кожны шасцідзесяты мінскі школьнік.
Калі разглядаць статыстыку па класах, можна заўважыць, што ў пачатковай школе доля беларускамоўнага навучання крыху вышэйшая, чым у сярэдняй і старшай школе. Гэта можа сведчыць пра пэўнае павелічэнне попыту на беларускамоўную адукацыю ў апошнія гады. Аднак розніца вельмі нязначная: нават у першых і чацвёртых класах па-беларуску навучаюцца толькі 1,8% дзяцей, таму казаць пра істотны пералом пакуль не выпадае.
Сталічны паказчык амаль у пяць разоў саступае сярэдняму па Беларусі і больш чым у дзесяць разоў — паказчыку Мінскай вобласці.
Мінск, які павінен быць галоўным культурным і адукацыйным цэнтрам Беларусі, сёння мае самую русіфікаваную школьную адукацыю ў краіне.
Каментары
Мінск і з'яўляецца галоўным культурным і адукацыйным цэнтрам Беларусі.