«Міс Беларусь» стала 18-гадовая мадэль. Яна атрымала ў падарунак 14 500 рублёў і аўтамабіль Geely
10 верасня ў Палацы спорту прайшоў фінал конкурсу «Міс Беларусь 2021». Пераможцай стала 18-гадовая Дар’я Ганчарэвіч. Яна працуе мадэллю і выкладчыцай дэфіле ў Нацыянальнай школе прыгажосці.
Апроч кароны з белага золата з брыльянтамі і тапазамі, дзяўчына атрымала грашовую прэмію — 14 500 рублёў (500 базавых велічынь) і брыльянтавыя завушніцы. Падарылі таксама аўтамабіль Geely.
У снежні Дар’я прадставіць краіну на міжнародным конкурсе «Міс свету» ў Пуэрта-Рыка.
На конкурсе сярод гасцей прысутнічаў Аляксандр Лукашэнка. А таксама міністр культуры Анатоль Маркевіч.
Першай віцэ-міс стала Аляксандра Папок. Ёй 19 гадоў, родам з Петрыкава, вучыцца ў БДЭУ на факультэце камерцыі і турыстычнай індустрыі. Займаецца SMM.
Другая віцэ-міс — 21-гадовая Юлія Іоўлева. Скончыла магістратуру Універсітэта культуры, прызёр міжнародных спаборніцтваў па мастацкай гімнастыцы.
Чым адметны сёлетні конкурс? За апошнія гады ён больш стаў асацыявацца са сферай дзяржаўнай палітыкі. У некаторых гарадах кастынгі прайшлі без ажыятажу: у Наваполацку і Брэсце наогул прыйшло па адной дзяўчыне.
Каментары