На велазаводзе ў Мінску выпусцілі электрычны мікракар за 9900 даляраў. Але ён не зусім беларускі
Мінскі мотавелазавод выпусціў электрамабіль, дакладней, электрычны квадрыцыкл. Пакуль гэта доследны ўзор, які яшчэ праходзіць выпрабаванні і дапрацоўку, пры гэтым яго ўжо можна купіць, паведамляе Zerkalo.io.
Квадрацыкл мае электрарухавік на 4 кВт, размешчаны ззаду пад багажнікам (даволі ўмоўным, ён з'яўляецца, калі скласці заднія сядзенні). Спераду ў яго літый-іённы акумулятар на 8 кВт*г, запас ходу чакаецца на ўзроўні 120-150 км, але пакуль гэта не дакладна. Зараджаецца машына за 6-8 гадзін ад разеткі, заяўлены расход энергіі — 6 кВт*г/100 км. У квадрыцыкле ёсць электраўзмацняльнік руля, кандыцыянер, мультымедыйная сістэма, камера задняга віду і іншыя «выгоды». Маса машыны складае каля 463 кг, піша ABW.by
Як патлумачылі журналістам супрацоўнікі завода, квадрыцыкл — беларуска-кітайскае тварэнне, прывезенае з-за мяжы, гэта доследны ўзор, у ім яшчэ дапрацоўваюць некаторыя аспекты, машына яшчэ не сертыфікаваная ў Беларусі. Тым, хто купіць гэты транспартны сродак, трэба будзе рэгістраваць яго ў ДАІ, для кіравання, хоць гэта і квадрыцыкл, патрэбныя правы катэгорыі «В». Хуткасць яго руху на дарогах агульнага карыстання не павінна перавышаць 60 км/г.
Пры гэтым машыну ўжо гатовыя прадаваць. Прадпрыемства прапануе замовіць яе за 9900 даляраў з 50-адсоткавай перадаплатай, пры гэтым можна будзе назіраць за зборкай свайго асобніка, а праз год эксплуатацыі пакупніку абяцаюць «кэшбэк» у 20% ад кошту. У працэсе лакалізацыі машыну маюць намер зрабіць таннейшай.
Цяпер квадрыцыкл называецца проста — M1NSK.
Аднак, як высветлілася, беларускім гэты аўтамабіль можна назваць толькі вельмі ўмоўна.
Як выявіў The Village, ён з'яўляецца поўнай копіяй мікракара Eleksa CityBug. Гэта электрычны аўтамабіль кітайска-афрыканскага паходжання. Eleksa — паўднёваафрыканская кампанія з офісам у Прэторыі, якая выпускае самыя розныя тыпы электрычных транспартных сродкаў, пачынаючы ад скутараў і мотаблокаў. Але сама вытворчасць машын размешчаная ў Кітаі ў правінцыі Шаньдун.
У ПАР продажы Eleksa CityBug пачаліся ў канцы 2021 года, і журналісты празвалі яго «самым танным электракарам Афрыкі». Кошт яго складае 230 тысяч рэндаў (каля 14 тысяч даляраў). Аўтамабіль прадаецца і на іншых рынках, у тым ліку ва Уругваі, Вялікабрытаніі, Германіі і некаторых іншых еўрапейскіх краінах. Ён сертыфікаваны ў Еўрасаюзе як цяжкі электраквадрыцыкл.
Дадамо: мяркуючы па фота, M1NSK з'яўляецца нават не копіяй Eleksa CityBug, а фактычна ім самім. На рулі і капоце квадрыцыкла, вырабленага на «Мотавелазаводзе», красуецца лагатып паўднёваафрыканскага брэнда.
Стала вядома, чаму пераможца беларускага адбору «Міс Сусвет» не едзе на конкурс. Яна знайшлася ў СІЗА13
Каментары